كيف تعلم ابناءك الدفاع عن النفس؟

كيف تعلم ابناءك الدفاع عن النفس؟

كتير مننا بيتمنى ان ولادنا يعتمدوا على نفسهم فى كل حاجة وخصوصا فى الدفاع عن نفسهم فمن أول مانوديهم الحضانه وبعدين المدرسة بنحس بخوف عليهم وازاى هيتصرف لو حد ضربه من زمايلة وكتير مننا متعود على اسهل كلمة وهيا اللى يضربك اضربة او قول للأبله وساعات نحتار نقوله يدافع عن نفسة ولا يقول للأبله بتاعته وياترى ايه هو الاسلوب السليم تربويا؟؟؟
اللي يضربك ….. اضربه:
لو سألنا المختصين عن الجمله دى هنلاقيهم ينقسموا فى الرد منهم اللى هايقول ان الجملة دى غير سليمه تربويا ومينفعش نقولها للطفل ، والرأى التانى ان الطفل لحد 7 سنين لازم نقوله الجمله دى علشان يتعلم يعتمد على نفسة ويدافع عنها ..
الرأى الصحيح :
خير الامور الوسط وهنجمع بين الرأيين فأولا لازم نعلمه الايجابيه فى الدفاع عن نفسة وان عرفنا ان فى حد من زمايله بيضربة فى الحضانة او المدرسة نقوله لو اتكرر تانى تقف مكانك ومتهربش وتمسك ايده وتقوله بمنتهى الشده وانت بتبصله ” كده غلط وبطل تضربنى” ولو حاول يضربه تانى يبقى يضربة ويقول للأبله انه حاول ان يمنعه من الاول لكنه كررها وكان لازم ياخد حقه لان هو اللى بدأ ومسمعش للتحذيرات .
طريقة فعالة جدا لتدريب الطفل على الدفاع عن النفس:
لو كنا خايفين ان ابننا مش عارف ياخد حقه ويدافع عن نفسه يبقى لازم ندربه عملى فى البيت على المواقف اللى هيحتاج انه يدافع عن نفسه فيها ، فمثلا ممكن الام تعمل دور الولد المشاغب اللى بيضرب ابنها فى المدرسة وتطلب منه انه يمسك ايديها بقوة ويبص ليها وبصوت عالى يقولها “بطل تضربنى دى حاجه غلط” وتبين امه انها خافت منه وانها مش هتضربة لانها خافت منه وانه قدر يخوفها ومش هتضربة تانى ونكرر العمليه دى ايام مختلفه وبطرق جديده.
الوسادة الشريرة:
ممكن كمان نجيب مخدة او عروسة لعبه وتمسكها امه وتضايق ابنها بيها او تضربة بيها براحه والمفروض انه يتعامل معاها وانه بكل حزم يقولها ان ده غلط ولازم تبطله بس لو مبطلتش امه تضايقه يبقى لازم يدافع عن نفسه ويحاول يرد الضرب بالضرب .
والتدريبات دى بتدى للطفل الثقه فى نفسة وتخليه يكسر رهبة التصرف لوحده وبالتالى هيقدر يعتمد على نفسة ويدافع عنها .
وفى النهاية لازم ناخد بالنا من حاجه مهمه جدا وهيا من الفاظنا اللى بتأثر بشكل كبير عليه يعنى لو مثلا قولناله انت جبان ومتقدرش تدافع عن نفسك هيقنع نفسة بده ويكون جبان ، لكن لوقولنا انت شجاع وبتعتمد دايما على نفسك هيقنع نفسة بده وهيكون شجاع .

 

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

حواديت ماما .. انتى لسه شوفتى حاجه ؟

حواديت ماما .. انتى لسه شوفتى حاجه ؟ محاولات تصدير الطاقة السلبية واحدة من أغرب …