7 نصائح لسلامة الحامل والجنين فى الاماكن المزدحمه

7 نصائح لسلامة الحامل والجنين فى الاماكن المزدحمه

الست الحامل بتتعرض لكتير من المواقف الصعبة فى حملها لان الوضع الجديد ده وبطنها الكبيرة بيخلوها تحتاج لطريقة معينة من الحماية علشان تقدر تحافظ على صحتها وصحة البيبىى ومن ضمن المواقف دى الوجود فى الاماكن الزحمه والنهارده هعرفك شوية نصايح فى الاماكن الزحمه.

خلى بالك من العدوى :

لو كنتى مضطرة تكونى موجوده مكان زحمة جدا هيكون خوفك الاكبر من العدوى ، لان فى الحالة دى ممكن الامراض تنتقل جدا علشان كده حاولى تستخدمى كمامة طبية اللى ممكن تشتريها من الصيدلية بكل سهولة.

ابعدى عن التدافع :

عدوك رقم اتنين هو التدافع فللأسف مع الزحمة ممكن يحصل تدافع اللى ممكن يخبطك فى حد او يزقك ، علشان كده حاولى انك تمشى فى الاماكن الفاضية اكتر ، وخليكى جنب ناس تعرفيهم يمنعوا الناس التانيه انهم يخبطوا فيكى وطبعا لازم تغطى دايما بطنك ياديكى علشان تحميها.

البسى جزمة مريحة :

غالبا المكان الزحمه اللى هتروحيلة مش هتلاقى فيه مكان تقعدى فيه بسهولة وعلشان كده هتفضلى واقفة وقت طويل علشان كده من الافضل دايما تلبسى جزمة مريحة لرجليكى.

البسى ملابس قطن واسعة :

الزحمة يعنى للأسف حرارة زيادة وخصوصا فى فصل الصيف فلو كنتى معرضة انك تكونى موجوده فى مكان زحمه البسى ملابس قطن واسعة.

خلى معاكى ازازة ميه صغيرة :

مع الزحمة والحرارة الزيادة هتحتاجى لشرب ميه بكميات اكبر من الطبيعى وعلشان تحمى جسمك من الجفاف حطى دايما فى شنطتك ازازة ميه صغيرة.

استخدمى شنطة صغيرة “كروس” :

الشنطه الصغيرة اختيار ممتاز فى الاماكن الزحمه لان الشنطة الكبيرة هتخبط فى جنبك كل شوية بسبب الناس اللى حواليكى وكمان هتكون حمل على جانب واحد من جسمك ودى حاجة مزعجة واحسن حاجه انك متشيليش شنط كبيرة خالص وانتى حامل.

اتنفسى براحة وبانتظام :

لو كنتى من الناس اللى عندها رعب من الزحمة يبقا لازم تتمالكى نفسك وتتحكمى فى خوفك وهيساعدك التنفس بانتظام على كده.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

المكواه بوظت شعرى .. ايه الحل؟

المكواه بوظت شعرى .. ايه الحل؟ فى ستات وبنات كتير مش بيقدروا يستغنوا عن استعمال …