حواديت ماما .. البيت هادى اخيرا هحقق احلامى

حواديت ماما .. البيت هادى اخيرا هحقق احلامى

ماريو في المدرسة وكوكو نايمة وجوزي في الشغل، هي دي فرصتي اللي مستنياها من زمان، اللحظة اللي بحلم بيها بقالي شهور، دلوقتي بس ممكن أحقق كل أحلامي المؤجلة المتعطلة.

أعمل إيه يا ربي؟ إزاي أستغل الوقت ده أحسن استغلال؟

أدخل استحمى؟ دي فرصة رائعة إني أستحمى من غير ما حد يخبط عليّا ويعيط ويتشحتف طول ما أنا جوه الحمام.

ولا ﻷ، ممكن أقرا مثلًا، أنا آخر مرة مسكت كتاب من شهور، ولو فكرت مجرد تفكير إني أقرأ، يا إما كوكو بتشد الكتاب وتقطعه، أو ماريو بتجيلي كل دقيقة تسألني سؤال، بس مش هلحق غالبًا كوكو هتصحى كمان نص ساعة.

ممكن مثلًا أعمل حاجة سريعة ومبهجة، أحط مانيكير، أنا بحب المانيكير جدًا، ودي فرصة أحطه من غير ما حد يشربه ولا يدلقه على الكنبة.

بس لو كوكو صحيت وهو مانشفش هضطر أشيلها ويتلخبط مش هينفع مانيكير.

أنا ممكن مثلًا أشرب فنجان قهوة تركي باللوز، وأعملها على رواقة زي زمان، أحط السبرتاية، وأعمل القهوة على الهادي، من غير ما أخاف من الحوادث، وآخد فنجان القهوة أشربه في الشباك، أو حتى وأنا مبحلقة في السقف، المهم إني أقدر أشربه على رواقة، بدل ما أنا بشربه كل مرة على بق واحد كأنه شربة.

وبعد كل ده، قبل ما حتى أعمل فنجان القهوة، كان صوت كوكو بيناديني!

#دكتور_مفيد
#روشتة_دوت_كوم
#الدواء_بقى_أونلاين

 

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

حواديت ماما .. انتى لسه شوفتى حاجه ؟

حواديت ماما .. انتى لسه شوفتى حاجه ؟ محاولات تصدير الطاقة السلبية واحدة من أغرب …