فرط الحركه وقلة الانتباه مرض منتشر بين الاطفال

فرط الحركه وقلة الانتباه مرض منتشر بين الاطفال

فى الايام دى ظهرت امراض كتير بيعانى منها الاطفال والمراهقين ومنها مرض فرط الحركة وقلة الانتباه وللأسف بعض الاسر متعرفش طرق التعامل مع طفلها اللى عنده المرض ده فالمعرفة هيا نص العلاج زى مابيقولوا .
فرط الحركة هو ان الطفل بيكون عنده زيادة ملحوظة فى النشاط الحركى واللى بتكون بشكل مش طبيعى فى البيت او المدرسة او الشارع وبيسببله فشل فى حياتة بسبب انه مش مركز ودايما مستعجل .
تعالو بقا نشوف اعراض المرض:
1. الحركة الكثيرة : الاطفال اللى عندهم المرض ده مش بيقدروا يقعدوا فى مكان واحد لفترة بيفضلوا يتحركوا فى كل مكان وفى كل اتجاه بسبب او من غير سبب بمعنى أصح مش بيهدوا ابدا.
2. قلة الانتباه : بيصاحب الحركة الزيادة قلة تركيز وقلة انتباه على اللى بنقولهم عليه لان قلة انتباهم قليلة جدا وعادة هما مش بيكملوا اى نشاط او لعبة بدأهوها وفى الغالب بيضيعوا حاجتهم ومش بيفتكروا فين حطوها.
3. الاندفاع : زى مثلا لما يجى يجاوب على سؤال تلاقيهم مش بيستنوا حتى لما السؤال يكمل لأ نلاقيهم بيندفعوا فى الرد والاجابه.
نيجى بقا لطرق العلاج ركزوا معايا اوى :
هنحاول نستخدم المعالجه النفسية باننا ندى للطفل لعبة القوالب الخشب حوالى 15 أو 20 دقيقة فلو ركز معانا فى الوقت ده نجرب نلعب معاه لعبة فريزر ونستعمل الساعه بانة يقف ثابت متجمد لثوانى وبعدين نزود الوقت بالتدريج فده هايساعده على التركيز اكتر.
وكمان مهم جدا اننا ننظم للطفل الوقت بتاعه يعنى امتى يصحى ، امتى بيرجع من المدرسة ، وامتى يتفرج على التليفزيون…وهكذا وممكن كمان نشتركله فى نشاط رياضى زى مثلا السباحة والعاب القوى علشان ينمى مهاراته الحركية ويوجهها التوجيه الصح ومن المهم كمان اننا منسبش الطفل لوحده فى الجنينة لانه هايلاقيها فرصه للشقاوة طبعا.
وكمان نستعمل اسلوب الثواب والعقاب وده من انسب الوسايل فى العلاج ونبعد عن العقاب الجسدى خالص.
اما فى المدرسة هنلاقى الطفل مش عارف يتأقلم مع قوانين المدرسة يبقى احنا لازم نشرح للمدرسة حالة الطفل علشان هما كمان يساعدوه.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

حواديت ماما .. انتى لسه شوفتى حاجه ؟

حواديت ماما .. انتى لسه شوفتى حاجه ؟ محاولات تصدير الطاقة السلبية واحدة من أغرب …