فطام الطفل من اللهايه

فطام الطفل من اللهايه

فى اختلاف كبير على اللهاية وفى ناس بتشجع عليها وناس رفضاها تماما بس فى امهات كتير بتلجأ لاستخدامها بس بتلاقى نفسها فى ورطة كبيرة لما يكون خلاص لازم نتخلص منها والاطباء بينصحوا فطام اللهايه فى عمر سنتين طيب ايه هيا الطرق السهلة لفطام الطفل من اللهاية:
1. خطة الايام الثلاثة:
اليوم الاول:
لو طفلك بالغ وفاهم فهميه انه خلاص جه الوقت علشان يكبر ولازم يسيب اللهاية وخلى كلامك معاه مايتعداش ال 30 ثانية مرتين فى اليوم وفهمية كمان براحه كده ومش أمر اننا هنتخلص من اللهاية فى خلال يومين.
اليوم الثانى:
عيدى علية كلامك تانى لمدة 30 ثانية مرتين فى اليوم وعرفية ان معاد التخلص من اللهاية هو بكره.
اليوم الثالث:
عرفيه انه خلاص الوقت حان وان النهاردة هو ميعاد جمع اللهايات فى كيس بلاستيك وقبل ماترميها فى الزباله اشرحيلة ان الزباله بيتعاد تصنيعها مرة تانيه وانها هتتحول لعرايس ولعب جديدة وهينجح معاكى الامر فى خلال 48 ساعة.
2.الطريقة التدريجية:
ابدئى بمنع اللهاية فى الاوقات اللى فيها الطفل مبسوط وهادى ومش محتاجها ومتتكلميش معاه اسحبيها بس بهدوء وبعد كده امنعى انك تاخديها بره البيت وفهمية ان اللهاية مش عايزة تخرج برة البيت وبعد كده امنعى استعمالها الا وقت النوم وبس وبعد فترة قوليله ان الدكتور بيجمع اللهايات للاطفال الجداد الصغيرين وبيجيب بدالها العاب جديدة للاطفال الكبار وبدلى اللهاية بلعبة جديدة.

ودى هيا المرحلة الاصعب عادة واكيد هتقضى بعض الليالى الصعبة المليانه بالعياط والتذمر بس اطمنى ده مش هيستمر غير لفترة قصيرة وايا كانت الطريقة اللى هتختاريها استعدى لايام وممكن اسبوع من العياط والتذمر والالحاح وخليكى فاكرة انك متستسلميش ابدا ادام خلاص اخدتى القرار.

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

لأم البنات .. 20 فكره للأستمتاع معهم

لأم البنات .. 20 فكره للأستمتاع معهم يا بنات يا بنات يا بنات اللي مخلفش …