الفوائد الطبيه والعلاجيه للسمسم

الفوائد الطبيه والعلاجيه للسمسم

السمسم بيتزرع فى الشرق الاوسط واسيا والسودان ، وفى مصادر تاريخيه كتير بتقول ان مصدر السمسم الهند ، ويعتبر من المزوعات المهمه.

التركيب الكيميائى للسمسم :

بتحتوى بذور السمسم على : زيت دسم ( زيت سيرج ) بنسبة 60% ، مواد بروتينيه 21% ، كربوهيدرات 18 % وبيحتوى السمسم كمان على مواد تانيه مفيده ومهمه وبيعتبر السمسم مصدر غنى بالكالسيوم الضرورى لنمو الجسم وكمان فيتامين هـ

الفوائد الطبيه للسمسم :

1_تعتبر بذور السمسم علاج للامساك وبتساعد على ادرار لبن الثدى للأم اللى بترضع وزى مااحنا عارفين ان من عاداتنا دايما نأكل الام اللى بترضع الحلاوه بعد الولاده على طول.
2_فى كمان تجارب عملوها على بعض الحيوانات بينت ان زيت السمسم بيخفض مستوى سكر الدم وبيرفع من مستويات الجلايكوجين.
3_بيستعملوا كمان كسب السمسم فى غذاء الماشيه وتسمينها.
4_كمان الطحينه بيصنعوها من بذور السمسم وطبعا لاغنى عنها فى المطبخ الشرقى وبنحطها على اكلات كتير اوى اوى وخصوصا البابا غنوج اللى بنموت فيه والفول وغيره.
5_السمسم بيستعمل فى صناعة الصابون والعطور والمطاط وكمان وقود للمصابيح.
6_الجسم بيدهن بزيت السمسم للعلاج وفى كمان العباده والتقديس خصوصا فى الهند.
7_انما بقا بالنسبه للصناعات الصيدلانيه بيستعمل زيت السمسم مذيب للأبره العضليه وخصوصا الهرمونات وبعض الفيتامينات لانه الزيت الوحيد اللى مش بيتجمد قبل تعرضه لدرجة حراره 5 درجه سيلسيوس.
8_زيت السيرج من الزيوت النباتيه غير المشبعه ولونه ذهبى وطعمه حلو وملوش ريحه وكمان مش بيزنخ زى بقية الزيوت ومش بيتجمد الا بدرجة حراره 5 درجه سيلسيوس ، وبيستعمل فى تحضير بعض المراهم اللى بتستخدم كمستحضرات تجميل وتطرية الجلد وكمان فى تحضير قطرة الودان وكمان بيستعمل لتدليك الصدر ومنطقة الرئتين والحلق علشان يريح من الكحه الناشفه ونزلات البرد . بس للأسف ممكن يغشوا زيت السمسم ويضيفوا عليه زيت البارفين وبيتغير لونه علشان كده لازم ناخد بالنا واحنا بنشتريه.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

4 انواع للصداع وطرق علاجها

4 انواع للصداع وطرق علاجها مهم انك تعرف نوع الصداع اللى بيصيبك عشان تقدر تتعامل …