نصائح هامه يجب اتباعها عند تناول الدواء

نصائح هامه يجب اتباعها عند تناول الدواء

لما بنيجى ناخد اى دوا بنعمل اخطاء كتير واللى بتقلل فاعلية الدوا جدا وبتحرم الجسم من فوايد الدوا ده للجسم عشان كده النهارده هاقولكوا اهم النصايح اللى لازم نعملها لما نيجى ناخد الدوا :

1_ الميه : افضل مشروب للبرشام والحبوب والكبسولات ، وده علشان عناصر الفواكه مثلا فيها مركبات نباتيه ثانويه كتير اللى ممكن تتفاعل مع الماده الفعاله الموجوده فى الادويه ، ونفس الحكايه بالنسبه للقهوه واللبن والشاى ، ويعتبر عصير الجريب فروت فى غاية الخطوره لانه بيغير كتير من الادويه لدرجة انه بيفقدها فاعليتها خالص.

2_ مينفعش نقسم القرص او الكبسوله الا لو كان عبوة الدوا مرسوم عليها خط تقسيم القرص وكان القرص نفسه عليه هو كمان الخط ده ، وده علشان المريض لو قسم الاقراص اللى مينفعش تتقسم هيعرضه لعواقب سيئه.

3_ لازم المريض يروح للدكتور الخاص بتاعه ويوريه قايمة الادويه اللى بياخدها ويستفسر لو كان ينفع ياخدهم كلهم فى نفس الوقت ولا لأ ، لان ده بيسهل على اغلب المرضى انهم ياخدوا الدوا فى معاده من غير ماينسوا اى نوع منهم.

4_ بعض الاقراص بتكون متغطيه بطبقه من الحمايه بتتمتع بمقاومة العصاره الهضميه بالمعده والطبقه دى بتمنع ان الماده الفعاله تتحلل الا بعد ماتوصل للأمعاء الدقيقه ، علشان كده لو اتخدشت الطبقه دى هتوصل الماده الفعاله بدرى للجسم وممكن يسبب عواقب سيئه للمريض.

5_ لازم تتأكد من الصيدلى وده حقك طبعا .. ازاى تاخد الدوا وقبل ولا بعد الاكل ولا فى نص الاكل ، لأن فى ادويه ممكن تأذيك لو خدتها على معده فاضيه زى مشتقات الاسبرين وأدوية المفاصل وفى غيرها كتير وكمان فى ادويه كتير بيتأثر امتصاصها مع وجود الاكل والعكس صحيح.

6_ متقبلش انك تشترى الدوا الا بعد كتابة طريقة الاستعمال عليه من الصيدلى وبخط واضح يقدر الكل يقراه وده كمان حقك .. لانك بتشترى ماده كيميائيه مش خيار وطماطم وممكن يسبب سوء استعمالها لكارثه صحيه .

7_ فى نوعيات تانيه من الاقراص بتتميز باللى بنسميه التأثير المتباطئ .. يعنى انها بتمد الجسم بالماده الفعاله الموجوده فى الدوا بالتدريج علشان كده لازم منقسمش الاقراص اللى من النوع ده لانه ممكن يسبب فى ظهور فاعلية الدوا او الاثار الجانبيه.

8_ بالنسبه للى بيستخدموا القطره ، لازم التركيز كويس وانت بتعد وتحسب عدد القطرات لان كل قطره بمعيار جرعه دوائيه فيها كميه معينه من الماده الفعاله وحاول ماتخدش القطرات الا بعد ماتضيفها على شوية ميه صغيره.

9_ لازم نتخلص من القطره اول مايتغير لونها وكمان لو اتكون رواسب فى القطره ، ومينفعش نستخدم القطرات ومراهم العيون بعد اربعه لـ ستة اسابيع من أول مانفتحها ، والا ممكن تتكون جراثيم فيها وتتنقل للعين ، وكمان ضرورى ان القطره متلمسش العين نفسها لانها ممكن تنقل العدوى للعين السليمه.

10_ بالنسبه للمرضى اللى حالتهم محتاجه استخدام قطرات الانف او البخاخه يبقا لازم ننضف الانف كويس قبل ماندخل القطره او البخاخه فيها والا ممكن تتلوث القطره او البخاخه بالجراثيم الموجوده فى الافرازات المخاطيه اللى فى الانف وتتنقل مره تانيه للأنف مع كل استخدام.

11_ بما اننا دايما بننسى ناخد الادويه فى مواعيدها المحدده ودى طبعا اكبر غلط بيقع فيه اغلب المرضى وخصوصا اللى مرضهم محتاج ياخدوا اكتر من نوع من الدوا طول اليوم ، ممكن تجيب علبه وتحط فيها كل الادويه اللى بتاخدها وبكده ممكن بالقاء نظره واحده على العلبه دى تعرف انت نسيت تاخد ايه.

12_ حاول على اد ماتقدر تاخد ادويتك وانت واقف أو قاعد لان ده بيسهل مرور جرعة الدوا من الفم للمعده.

13_ متسلفش الدوا ولا تستلفه لان الدوا اللى ممكن يفيد صحتك متستغربش انه ممكن يكون سم لغيرك حيث لاينفع الندم.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

رائحة حديثى الولاده

رائحة حديثى الولاده الأطفال حديثى الولاده يفرز جسمهم رائحة مميزه تجذب البشر وخصوصا النساء . …