طرق التخلص من قشر الشعر للرضيع

طرق التخلص من قشر الشعر للرضيع

كل أم مهووسه بنضافة البيبى بتاعها وبتحميه كل يوم تقريبا وبتهتم على تنضيف اللى بين صوابعه وودوانه ومناخيره واللى بين تنيات جسمه وبالرغم من كل ده اتفجأت بظهور قشره تخينه فى فروة راس ابنها وبتتضايق او من شكلها ومفيش مفر من التعامل معاها والتخلص من البقع دى خالص .. ودلوقتى انا هقولك على الطرق الطبيعيه لازالة قشرة الراس من غير تعب خالص.

الاول لازم نعرف ليه بتنمو قشرة الراس عند البيبهات الصغيره من اساسه ؟؟
بتتكون قشرة الراس عند البيبى من تراكم طبقات الزيوت اللى بتفرزها راسه والقشور وبقايا الجلد الميت وممكن يكون السبب كمان التغيرات الهرمونيه اللى بتمر بيها الام فترة الحمل واللى بتحفز الغدد الزيتيه على افراز زيوت كتيره ، يبقى الموضوع ملوش اى علاقه بالنضافه الشخصيه للبيبى او بكمية الاعتناء بيه اطلاقا.

ازاى اعالج ابنى من قشرة الشعر ؟؟

1_ الشامبو : حطى شوية شامبو خفيف على راس البيبى لمدة دقايق مثلا لحد ماتخلصى تنضيف جسمه لان الشامبو بيفكك جزيئات القشره بس اهتمى بعد كده بغسيل راسه كويس اوى من الشامبو عشان ممكن يسبب جفاف فروة الراس.

2_ زيت الزيتون أو زيت اللوز : حماتى بصراحه كده هيا اللى ليها الفضل علشان اعرف مفعول السحر لاهمية زيت الزيتون لانه مفيد جدا لمنع التسلخات وتدليك الجسم بيه والتخلص من قشرة الراس وتقدرى تحطى شويه منه على فروة الراس وتسرحى لابنك شعره بفرشة السنان او مشط سنانه ناعمه وضيقه واعملى ده فى كل مره تحميه فيها ومش هتلاقيليها اثر بعد كده.

3_ زيت جوز الهند : حطى شويه منه قبل ماينام البيبى وسيبيه على راسه طول الليل وبعدين سرحى شعره بالمشط بتاعه الصبح واحكيلنا بقا عن المعجزه اللى هتحصل من غير سحر ولا شعوذه ، وبالمناسبه .. اهتمى على وجود زيت جوز الهند فى دولابك لانه روعه فى ترطيب البشره وازالة المكياج وتنعيم الشعر وتغذيته.

4_ الفازلين : حطى الفازلين على راس البيبى بليل وسرحيله الصبح ومش هتلاقى للقشره أثر.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

مخاطر تقبيل الطفل من فمه

مخاطر تقبيل الطفل من فمه تقبيل الوالدين لطفلهم من اجمل الاحاسيس اللي بيحسوا بيها وبيظهروا …