المكواه بوظت شعرى .. ايه الحل؟

المكواه بوظت شعرى .. ايه الحل؟

فى ستات وبنات كتير مش بيقدروا يستغنوا عن استعمال مكواة الشعر الكهربا فى البيت لانها بتخلى الشعر جميل وجذاب لكن ممكن يسبب استخدامها كتير فى ظهور مشاكل فى الشعر زى مثلا جفاف الشعر او تقصفه وضعف البصيلات ، والنهارده هقدملك النصايح اللى هتساعدك على حماية شعرك من انه يبوظ بسبب حرارة المكواه ويفضل دايما شكله صحى وبيلمع …

أول حاجه لازم تتجنبى استخدام المكواه وشعرك مبلول : لازم يكون الشعر ناشف خالص لما تيجى تستخدمى المكواه لان استخدامها على الشعر المبلول بيبوظ الطبقات الخارجيه من خصلات الشعر بدل مايفردها.

تانى حاجه قسمى شعرك لأجزاء : عشان تاخدى احسن النتايج قسمى شعرك لخصلات صغيره وابدئى من الجزء اللى ورا وبعدين اللى فوق وبالطريقه دى هتتجنبى الوقوع فى انك تمشى المكواه اكتر من مره على نفس الخصلات ولو ده حصل انتى كده هتدمرى شعرك .

استخدمى درجة حرارة المكواه اللى تناسب شعرك : مهم جدا تعرفى ان درجة الحراره اللى بتتناسب مع الشعر المجعد متتناسبش مع الشعر العادى وهكذا ، فكل نوع شعر عايز درجة حراره معينه عشان كده خدى بالك من الارشادات اللى فى دليل استخدام المكواه وتعرفى ازاى تظبطيها مع نوع شعرك عشان متتسبش فى انه يبوظ .

ابدئى بدرجة حراره متوسطه : عشان توصلى لأنسب درجة حراره تناسب شعرك ابدئى تكوى شعرك بدرجة حراره متوسطه لان الحراره العاليه بتبوظ الشعر والواطيه مش بتفرده واللى هيخليكى تعيدى عليه مره تانيه وتضرى شعرك.

اتجنبى شد خصلات شعرك وانتى بتفرديه : ستات كتير بيتعمدوا شد خصلات شعرهم بطريقه عنيفه وهما بيفردوه متخيلين انهم بالطريقه دى هتخليه مفرود اكتر ، لكن ده بيبوظ الشعر وبيعرضه للتقصف والسقوط وعشان تفردى خصلة الشعر صح ارفعى جذور الشعر لفوق براحه بالمكواه وبعدين تمرريها على باقى الخصله براحه .

استخدمى عازل للشعر : استخدمى سبراى للشعر المضاد للحراره أو شوية سيروم صغيرين لحمايتك من ضرر حرارة المكواه ، رشى شويه صغيره من الاسبراى الواقى من الحراره على شعرك وسيبيه ينشف خالص قبل ماتبدأى فى استخدام المكواه .

سرحى الشعر : لازم تسرحى شعرك بالفرشه قبل ما المكواه تلمسه عشان تفكى العقد والتشابك وعشان تكوي شعرك بسهوله .

متربطيش شعرك : متربطيش شعرك على طول بعد استخدام المكواه ، لازم الاول تبردى شعرك بانك تقلبيه لقدام وتسلطى الهوا عليه وبعد شويه تقدرى تربطيه ديل حصان أو كعكه او اى تسريحه انتى عايزاها .

اهتمى بصحة شعرك : استخدمى حمام الكريم ومغذيات الشعر كل اسبوع عشان تقوى شعرك ويقدر يستحمل اجهاد حرارة المكواه او البيبي ليس ، وكمان لازم تهتمى بتنضيف الشعر كويس قبل ماتستخدميها لأن تراكم الزيوت ومستحضرات التجميل على الشعر بيسبب تلفه مع زيادة الاضرار فى حالة التعرض لسخونة المكواه وهوه ده اللى بيسبب التقصف والاضرار بالشعر .

متغسليش شعرك بعد استخدام المكواه : استنى 3 ايام على الاقل قبل غسل الشعر لان تعرضه للميه على طول بعد الحراره ممكن يسبب تجعيده وجفافه مع الوقت .

اختارى مكواة شعر عالية الكفاءه : علشان تاخدى افضل النتايج وانتى بتفردى شعرك بالمكواه يبقى لازم تختارى نوع يتناسب مع طبيعة شعرك وتتميز بجوده عاليه تدوم لسنين .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

10 حلول لتخفيف الام الثديين خلال الرضاعه

10 حلول لتخفيف الام الثديين خلال الرضاعه من أهم التوصيات اللي بتتقدم للأم الحامل فى …