المصابون بأمراض المعده وصيام شهر رمضان

المصابون بأمراض المعده وصيام شهر رمضان

كل حاجه فى الدنيا ممكن اقبلها الا معدتى ووجعها وحموضتها أو قرحتها ..

جمله متكرره بسمعها فى بيتى او من صحابى او زمايلى فى الشغل فى الايام العاديه وفى رمضان خصوصا ، جمله ملهاش علاقه بسن أو مهنه أو جنس ، الكل متفق بس على وجعها الجامد والمستمر والمتكرر .

من اكتر الامراض والشكاوى اللى بنسمعها كل يوم فى الشهر الفضيل هيا الحموضه والحرقه او اللى بنسميه الارتداد الحمضى او فى الحالات المتطوره القرحه المعديه وخصوصا بعد فترة صيام طويله وتناول كميات كبيره من الاكل دفعه واحده على الفطار عشان كده بنحس باضطرابات هضميه مزعجه والام فى البطن وحموضه وحرقه وممكن تتمد من المعده للحلق احيانا .

غالبا بيساعد العلاج الغذائى والنصايح الغذائيه والثقافيه فى السيطره على الحاله دى ، طبعا فى بعض الحالات لازم اللجوء للأدويه بعد استشارة الدكتور أو الصيدلى فحاول اتباع الارشادات دى على أد ماتقدر :
1_ امضع الاكل كويس قبل البلع وكل ببطء .
2_ متشربش الميه دفعه واحده وبكميات كبيره واشرب رشفات قليله وقت الفطار وبعدين شويه صغيره بين الوجبه أو بعدها .
3_ اتفادى الوجبات الكبيره الدسمه وحاول تركز على الخضار والسلطات .
4_ حاول انقاص وزنك لو كنت بتشتكى من زيادة الوزن .
5_ حاول الاقلاع عن التدخين أو تسيبه خالص لو امكن .
6_ متكترش من شرب القهوه والشاى والسكر لانها بتزود من خطر الاصابه بالقرحه أو تتعثر عملية الشفا.
7_ اعتمد نظام غذائى بيركز على الالياف زى الشوفان والرز الكامل والفاكهه والخضار .
8_ متكترش من المقليات والوجبات الدسمه .
9_ متكترش من شرب العصاير والحلويات بأنواعها .

وكمان فى أعشاب ومكملات غذائيه مهمه :
عندنا اعشاب طبيه ومكملات غذائيه ممكن انها تساعد فى التقليل من الحموضه والحرقه وتقلصات المعده زى :
_ البابونج : بيحتوى على مواد مضاده للتقلصات والالتهابات وكمان بيساعد على التئام الجروح بسرعه .. حط 4 معالق صغيره من البابونج على كوباية ميه مغليه ويتنقع 10 دقايق وتشربه دافى على معده فاضيه 3 مرات فى اليوم ولفتره طويله .

_ العرقسوس : شراب شعبى رمضانى متوفر دايما وممكن تحضره بأنك تاخد البودره وتحط عليها شوية بيكربونات ويتنقع فى الميه بتركيز عالى وبعدين تاخد معلقتين من العصير ده وتصفيهم بقماشه وبعدين تحطها فى نص كوباية ميه لمدة نص ساعه قبل ماتشربها بس احذر من عصير العرقسوس لو كنت بتعانى من امراض القلب والضغط المرتفع .

_ الموز : علاج كويس لقرحة المعده لكن متكترش منه لو كنت تخين أو مريض سكر

_ فيتامين أ : بيساعد فى شفاء القرحه لانه بيساعد فى شفاء وتجديد الانسجه بس متكترش منه لو كنت بتشتكى من حصى فى الكلى أو لو كنتى حامل .

_ الزنك : ضرورى وبيساعد فى شفاء الانسجه .

واخيرا ياريت نحاول نغير نمط حياتنا وعادتنا الغذائيه الغلط خصوصا فى شهر رمضان الكريم ونتمتع بنظام غذائى صحى متوازن ونعتدل فى كل حاجه حتى فى الأكل والشرب ومناكلش الا لما نجوع بس ومنملاش معدتنا لحد الاسراف وصدق رسولنا الكريم صلى الله عليه وسلم لما قال .. نحن قوم لا نأكل حتى نجوع واذا أكلنا لا نشبع .. صدق الله وصدق رسوله الكريم .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

أمراض الكلى والصيام فى رمضان

أمراض الكلى والصيام فى رمضان على مريض الكلى في رمضان مراعاة حالته الصحية واستشارة الطبيب …