علاج مشكلة الشعر الخفيف

علاج مشكلة الشعر الخفيف

لو كان عندك بنوته فأنتى اكيد بدلعيها بكل الطرق ، اما بالنسبه لشعرها اكيد هدفك الاساسى دايما واللى بيتطلب منك عنايه جامده لان الشعر ليه اهميه كبيره لكل البنات اللى بتحب الجمال عشان كده اى أم بتهتم بشعر بنتها عشان يطول ويكون صحى وخصلاته قويه وناعمه ، وساعات بنلاقى امهات كتير بيشتكوا من شعر بناتهم انه خفيف وبيحاولوا يعرفوا السبب ويعالجوه من تجارب الامهات اللى حواليهم من غير مايوصلوا لاى نتيجه ايجابيه .. لكن دلوقتى فى المقاله دى هقولك على احسن الطرق اللى هتساعدك على تكثيف شعر بنتك .

1_ قص الشعر : لازم تقصى أطراف شعر البنات كل 45 يوم على الاقل لان البنات فى العمر الصغير بيتميزوا ان شعرهم بيطول بسرعه ولازم تختارى شكل القصه اللى تمشى مع عمر بنتك .

2_ تسريح الشعر : ثبتى لبنتك ديل الحصان لانها من اكتر التسريحات اللى بيتساعد على تطويل شعر البنات وزيادة كثافته … وابعدى عن الضفيره أو قللى منها لانها بتخفف الشعر بسبب كتر شد الضفيره … وممكن تلجأى لتقصير الشعر أو الشعر المدرج لو كان الشعر طويل عشان يبان شكله اتقل من الحقيقى .

3_ نوعية التوك اللى بتستخدميها : استخدمى توك الشعر الخفيفه والناعمه على شعر بنتك زى التوك المتغطيه بشريط ستان أو قماش ناعم ومتستخدميش ابدا الاساتك .

نصايح للأم للعنايه بكثافة شعر بناتها :

_ ادى بنتك الفيتامينات والعناصر الغذائيه المهمه اللى تحافظ على رونق الشعر .
_ متكتريش من استخدام مستحضرات العنايه بالشعر زى الجل والاسبراى .
_ متستخدميش كريمات الفرد والصبغات على شعر الاطفال اللى أقل من 5 سنين .
_ استخدمى الحنه لشعر بنتك لان فيها مواد طبيعيه بتساعد فى تقوية خصلات الشعر .
_ ابعدى عن شد الشعر اوى وانتى بتربطيه لان ده بيسبب صلع من قدام .
_ استخدمى بعض الوصفات والزيوت الطبيعيه اللى بتساعد على تكثيف الشعر زى زيت اللوز أو زيت السمسم أو زيت جوز الهند أو زيت الزيتون أو زيت الخروع .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

حواديت ماما .. انتى لسه شوفتى حاجه ؟

حواديت ماما .. انتى لسه شوفتى حاجه ؟ محاولات تصدير الطاقة السلبية واحدة من أغرب …