اليوجا .. رياضة الروح والجسد

اليوجا .. رياضة الروح والجسد

لما بتخيل رياضة اليوجا بتخيل أوضه هاديه فيها شموع معطره وحصير محطوط على الارض وستات ورجاله قاعدين مربعين رجليهم وعينيهم مغمضه ! كنت فاكره ان اليوجا بتعتمد على التأمل والاسترخاء وتصفية الذهن ، خلاص بقا جه وقت الحقيقه اللى معرفتهاش الا لما روحت بنفسي لجلسة يوجا ولاقيتها اكتر من ده بكتيييير ، بالاضافه للتأمل فاليوجا عباره عن تمرين رياضى متكامل بتخرج من جلساته بتصب عرق من المجهود اللى عملته .

لليوجا فوايد كتير جسمانيه ونفسيه تعتمد فى الاساس على أنواع اليوجا اللى بتختارها ، ودى فوايد اليوجا :

1_ فوايد اليوجا للتخسيس وانقاص الوزن : فى أنواع من تمرينات اليوجا اللى هتساعدك على خسارة الوزن بتكون زى تمارين لتنشيط القلب زى باور يوجا .

2_ لو حسيت ان جسمك متصلب شويه فاليوجا بتساعد على زيادة مرونة الجسم بالأخص الضهر والكتاف .

3_ التدريب على اليوجا بيساعد على التخلص من التوتر وبيساعدك على الشعور أكتر بالاسترخاء .

4_ مش هتلاقى نفسك قاعد على الكرسى وضهرك محدب لان اليوجا بتحسن من طريقة جلوسك وهيئتك الاجماليه وكمان بتقلل من الام الضهر .

5_ ثبت علميا ان من أهم فوايد اليوجا التقليل من الاكتئاب .

6_ بما ان اليوجا بتحسن من حالتك المزاجيه والتوتر فهى بتساعدك على النوم بطريقه أفضل .

7_ اليوجا بتديك طاقه كبيره ففى نهاية اليوم لما تحس انك استهلكت كل طاقتك ، الا ان لو قومت بجلسة يوجا سريعه هتساعدك على تجديد طاقتك والشعور بالانتعاش من جديد .

8_ ممكن لليوجا كمان انها تحسن من حالة جسمك داخليا لانها بتنشط الاجهزه والدوره الدمويه واللى هيساعد جسمك على التخلص من السموم .

9_ رياضة اليوجا بتشد الجسم بالكامل وعضلاته .

10 _ عند الاقبال على ممارسة اليوجا توقع انك تقوم بوضعية الوقوف على رجل واحده زى مابتشوفوا فى الافلام لان الوضعيه دى بتديك قوه كبيره وهتحس ان جسمك أصبح أكتر اتزان .

11_ رياضة اليوجا بتعلمك كمان فن التأمل واللى بدوره هيساعدك على التخلص من التوتر والارق .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

نصائح لتجنب العصبيه فى رمضان

نصائح لتجنب العصبيه فى رمضان كتير مننا بتتملكه العصبيه وقت الصيام فى رمضان واللى بيخليهم …