تخلص فورا من طعامك الذى لمسه الذباب

تخلص فورا من طعامك الذى لمسه الذباب

طبعا مع فصل الصيف بيزيد أوى الدبان والحشرات المزعجه واللى بتضايقنا كلنا ، طيب امال لو عرفت ان وقوف دبانه واحده على الأكل كفايه انها تخليك ترمى الأكل فى الزباله وده بسبب حجم الضرر اللى هتسببه الدبانه دى للأكل .
أوضح عالم الحشرات رون هاريسون ان السبب الرئيسى اللى يخلينا نتخلص من الأكل اللى وقف عليه الدبان … وده اللى قاله بالظبط .. “يكفي أن يضع الذباب أرجله وشعره على الطعام أو الأجسام لنقل جميع الجراثيم والميكروبات التي يحملها إلى طعامك”.
وكمان قال هارسون ان الدبان بيكون محمل بـ 200 شكل مختلف من البكتيريا والجراثيم الضاره على الشعر اللى مغطى ايديه ورجليه من الأماكن والفضلات العضويه زى الحيوانات الميته والفضلات البشريه والحيوانيه اللى بيقف عليها الدبان .
وكمان قال هارسون ان الدبان بمختلف أنواعه يقدر ينقل الأمراض المعديه الخطيره زى الكوليرا والتهاب الامعاء والتيفويد وغيرها ، عشان كده حذر من تناول الأكل اللى وقف عليه الدبان لأن الدبان كمان بيتقيأ فى أغلب الاحيان لما بيقف على أى أكل أو جسم .
وقال كمان هاريسون ان الدبان والحشرات مش بتعرف تمضغ وبالتالى بتخرج انزيمات الهضم على الأكل عشان كده لازم ناخد بالنا بعد كده لما تقف دبانه أو حشره على الأكل ولازم منلمسوش ونرميه خالص.

بس لازم دلوقتى نقف عند حديث مهم أوى ونشوف التفسير العلمى لحديث الذبابه ..
ففي الحديث الصحيح أن رسول الله صلى الله عليه وسلم قال: إذا وقع الذباب في إناء أحدكم فليغمسه كله ثم ليطرحه، فإن في أحد جناحيه داء، وفي الآخر دواء. رواه البخاري من حديث أبي هريرة.

الحديث ده معناه ايه ؟؟ هقولك حالا ركز معايا ..
أول حاجه : ان الدبان ناقل داء ودى حاجه خلاص بقت معروفه للكل .
تانى حاجه : واللى ميعرفهاش ناس كتير ان الدبان بيحمل مضادات للجراثيم من النوع الممتاز كمان .
طيب نفسر أكتر .. يعنى لو وقعت دبانه فى الأكل وانت شلت الدبانه ورمتيها من غير ماتغمسها فى الأكل هتفضل الجراثيم فى المكان اللى وقعت فيه الدبانه وتيجى انت تاكل منه ولو لقت الجراثيم اسباب مساعده هتتكاثر وهتسبب المرض ومتحسش الا وأنت فريسه للحمى ونايم فى السرير عيان.
طيب لو غمست الدبانه كلها فى الأكل هتعمل ضغط جوه الخليه الفطريه الموجوده مع جسم الدبانه ويزيد توتر البروز والسايل جواها زياده تسبب انفجار الخلايا وخروج الانزيمات الحامله لجراثيم المرض والقاتله له وتهلكها وتبديها ويبقى الأكل وقتها طاهر من الجراثيم المرضيه .

وبكده بيكون وضع العلماء بأبحاثهم تفسير للحديث النبوى المؤكد لضرورة غمس الدبانه كلها فى العصير أو الأكل عشان يخرج من بطنها الدوا اللى بيكافح اللى بتحمله من داء .
سبحان الله والله أعلم.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

رائحة حديثى الولاده

رائحة حديثى الولاده الأطفال حديثى الولاده يفرز جسمهم رائحة مميزه تجذب البشر وخصوصا النساء . …