زيادة الكهرباء فى المخ عند الاطفال

زيادة الكهرباء فى المخ عند الاطفال

بيحصل ان ممكن الأم تروح للدكتور وتتفاجئ انه قالها ان أبنها بيعانى من كهربا زيادة فى المخ .. ده معناه ايه ؟ وايه أسبابه ؟ وازاى التغلب على الحاله دى ؟

بتتواصل الخلايا العصبيه الموجوده فى المخ مع بعضها عن طريق نشاط كهربائى بيتحكم فيه أيونات البوتاسيوم والصوديوم وبيحصل خلل معين فى حركة الايونات دى ، بيسبب حدوث نوبه من التشنجات وفى حالة تكرار نوبات التشنجات دى بيتم تشخيص المريض كمريض صرع .

ايه اللى بيسبب التشنجات ؟
فى أسباب كتير لحدوث التشنجات وطبقا لبعض الدراسات فان 70% من البشر بيتصابوا بنوبه تشنج وحيده فى حياتهم غير مبرره أو معروفة السبب .
تقييم نوبة التشنج الأولى بيحتاج اللجوء لأخصائى أمراض عصبيه عشان بيدقق فى ملابسات حدوث التشنج بالاضافه لفحص عصبى شامل وبعض الفحوصات الطبيه اللى غالبا بتشمل رسم المخ وأشعة مقطعيه أو رنين مغناطيسى للمخ .

بعد التقييم الطبى والفحوصات بيقرر الدكتور الخطوات التاليه للتشخيص والعلاج :

ايه هيا الاعراض المصاحبه لنوبات زيادة النشاط الكهربى فى المخ ؟
بتعتمد الاعراض المصاحبه لحدوث التشنجات على مكان حدوث النشاط الكهربى الزايد فى المخ ، وزى مااحنا عارفين كلنا ان المخ بيتكون من مراكز بتتحكم فى وظايف الجسم المختلفه وعلى حسب المراكز المتأثره بتظهر الاعراض .
بيفضل العرض الرئيسى هو التشنجات لان النشاط الكهربى الزايد بيمتد ويأثر على المخ كله ويفقد المريض الوعى ويقع على الارض وتظهر حركة التشنجات على الدراعين والرجلين ، التشنجات ممكن يصاحبها عض اللسان أو فقدان السيطره على البول أو البراز وغالبا بتستمر النوبه لفترة متزدتش عن 5 دقايق وبتنتهى تلقائى .
أهم حاجه لازم نراعيها وقت النوبات هو حماية راس الطفل بأنها تتخبط فى أى جسم صلب ، ومن المتعتقدات القديمه بأنهم يحطوا حاجه جوه بؤه لحماية لسانه وثبت انها اعتقادات خاطئه وغالبا بتنتهى المحاوله باصابة الطفل أو اللى بيسعفه .

ايه هو علاج حالات زيادة النشاط الكهربى فى المخ ؟
فى أدويه كتير بتستعمل لعلاج الحالات دى والدكتور بيختار الانسب لكل حاله .
ولازم كمان تغيير نظام حياة الطفل عشان نحاول نقلل حدوث النوبات وممكن التغيير ده يشمل :
_ النوم بدرى ولفترات كافيه .
_ تناول وجبات منتظمه متكامله .
_ الحرص على ممارسة نشاط رياضى مناسب .

ولازم كمان نقول ان مع تلقى العلاج المناسب بيقدر معظم المرضى الحياه بطريقه طبيعيه خالص والمعتاد دلوقتى ان الناس متعرفش بمرض الطفل نهائى لأن الأدويه بتسيطر على المرض سيطره كامله لو تم الانتظام عليها بشكل سليم .

#دكتور_مفيد
#روشتة_دوت_كوم
#الدواء_بقى_أونلاين

 

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

حواديت ماما .. انتى لسه شوفتى حاجه ؟

حواديت ماما .. انتى لسه شوفتى حاجه ؟ محاولات تصدير الطاقة السلبية واحدة من أغرب …