فوائد نوم الرضيع بجوار أمه

فوائد نوم الرضيع بجوار أمه

نوم الطفل الرضيع فى حضن أمه فى السرير ده موضوع بيحير كتير اوى من الامهات ، انهى أحسن أنام جمبه ولا اسيبه ينام لوحده ؟؟

وده اللى هجاوبك عليه حالا :

فى ابحاث كتير اتعملت عملى ونفسى لأهمية نوم الاطفال اللى بيرضعوا جمب أمهم خصوصا فى الشهور الأولى من عمر الطفل عشان ضمان سلامة تكوين دماغهم وصحة قلوبهم ونموهم النفسي وكمان قالت الدراسات والابحاث دى بعض الحاجات المهمه عن نوم الطفل الرضيع جمب الأم فى الفتره الأولى من عمره .

نوم طفلك فى سريره لوحده بيخلى ساعات نومه أقل ده غير شعوره بالوحده والخوف كمان ، أبنك بيتعرف على العالم من خلالك وبيطمن فى حضنك وبيميز ريحتك وصوت دقات قلبك ونغمة صوتك .

فى أطفال كتير نومها مبيكنش عميق وبيصحوا بسرعه من أقل صوت أو مجهود لأن الطفل فى الشهور الأولى بيلاقى صعوبه فى الدخول فى النوم العميق عشان كده بيكون محتاج مساعدة أمه بدفا حضنها وحنانه عشان ياخد قسط كافى من النوم العميق وده بيساعد على نموه بشكل أحسن .

وأكدت الدراسات كمان ان الاطفال محتاجين النوم جمب امهم لحد سن 3 سنين على الأقل وكمان الاطفال اللى بيناموا لوحدهم بعيد عن امهاتهم اتعرضت قلوبهم للاجهاد أكتر تلات مرات من اللى بيناموا فى أحضان أمهاتهم .

والابحاث قالت كمان الأثر السلبى على نوم الاطفال بعيد عن امهاتهم انه بيصعب الترابط والتواصل بين الأم وطفلها وبيأثر على مستوى نموهم وبيزيد العصبيه والتوتر عندهم خلال السنين الأولى من العمر لشعورهم بالحرمان .

أثبتت الدراسات عدم صحة الاقاويل بأن نوم الأم جمب الطفل هتخليه يعانى من متلازمة الموت المفاجئ فى المهد أو تتقلب الأم على الطفل وموته بالاختناق ، بس كل ده بيرجع لأسباب تانيه زى التدخين جمب الطفل أو وجود مخدات كبيره جمبه .

فى النهايه لازم اقولكم على تأكيد العلماء بضرورة احتضان طفلك والنوم جمبه وده عشان نمو مثالى وصحى ، خصوصا فى الشهور الأولى بعد الولاده على الأقل ولازم يحس طفلك بالأمان وعدم التوتر عشان دماغه تنمو بشكل سليم والحفاظ على سلامته النفسيه.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

حواديت ماما .. انتى لسه شوفتى حاجه ؟

حواديت ماما .. انتى لسه شوفتى حاجه ؟ محاولات تصدير الطاقة السلبية واحدة من أغرب …