الفرق بين التفاح الأحمر والأخضر

الفرق بين التفاح الأحمر والأخضر

أكيد اغلبنا لما بنيجى نشترى التفاح مش بيكون الاختيار صعب أوى بين الأحمر والأخضر لاننا مش بنلاقى فرق كبير بين النوعين غير اللون والطعم الحامض المميز للتفاح الأخضر .
بس تعرف ان فيه فرق بين اللونين من التفاح ؟ وياترى أنهى فيهم أحسن للصحه وأكتر فايده ؟

يعتبر التفاح من الفاكهه المهمه فى العلاج والطب ، وعلى رأى المثل .. تفاحه فى اليوم تغنيك عن زيارة الطبيب . والظاهر كده المثل مش بيكدب لأن التفاح فعلا ليه فوايد كبيره ومنها :

تقوية اللثة وتنضيف السنان.
تقليل مستويات الكوليسترول السيء في الدم.
تقوية جهاز المناعة ومهاجمة الفيروسات.
تحسين عمل الجهاز الهضمي.
مد الجسم بكمية وافرة من الألياف. عشان الثمرة الواحدة بتحتوى على حوالي 30% من الألياف.

والفوايد دى جزء بسيط من الفوايد الكبيره اللى ملهاش عدد للتفاح ، انما بقى اللى ليه علاقه بسؤالنا عن أنهى أكتر فايده ، للتفاح الأخضر فوايد كبيره تخليه يتفوق على نظيره الأحمر شويه .

التفاح الأخضر طعمه حامض وبيحتوى على كميه أقل من السكر وأكتر فى الألياف وكمان غنى بمضادات الأكسده أكتر من الأحمر ، وغنى بمواد بيوكيميائيه وفيتامينات بتقلل من ظهور التجاعيد وبتزود جمال البشره .
ده غير أنه غنى بكميه كبيره من المواد الغذائيه وليه خصائص مدهشه وفريده فى الحفاظ على الجهاز الهضمى وتصفية الكبد من السموم وكمان ليه اثار كبيره تمنع تكوين حصى الكلى والمراره .

ده غير كمان ان مستحضرات التجميل الطبيه اللى بتقول انها بتكافح الشيخوخه بتستخلص موادها الكيميائيه الفعاله من التفاح الأخضر ، لأنه مخزن هايل للفيتامينات الأسايه لحيوية البشره وشدها ، واهمها فيتامين E المعروف بفوايده الجماليه الكبيره .

وزى ما أستنتجت الدراسات ان الناس اللى بيداموا على أكل التفاح الأخضر بشكل منتظم ويومى بمعدل تفاحه واحده فى اليوم بتتميز بشرتهم بالنعومه والسلاسه وتأخر ظهور التجاعيد فيها .

ده مش معناه ان التفاح الأحمر مش مفيد ، النوعين بيتمتعوا بفوايد كتير لكن مخزون المواد الغذائيه بيزيد فى اللون الأخضر أكتر من الأحمر .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

رائحة حديثى الولاده

رائحة حديثى الولاده الأطفال حديثى الولاده يفرز جسمهم رائحة مميزه تجذب البشر وخصوصا النساء . …