المفتاح السحرى للسعاده فى العلاقه الزوجيه

المفتاح السحرى للسعاده فى العلاقه الزوجيه

البيت السعيد مش مبنى على الحب لوحده ، الحب زى النبته الخضرا اللى بتحتاج ميه وضوء وهوا عشان تنمو وتكبر ، كده برضه الجواز بيحتاج للثقه والاحترام والتسامح والمشاركه عشان يقوى ويستمر بين الزوجين ، والنهارده هعرفك المفتاح السحرى لحياه زوجيه سعيده .

الازواج اللى بيصارحوا بعض بمخاوفهم ورغباتهم ومدى رضاهم عن العلاقه الحميمه بيكونوا الأكتر سعاده ، انما الازواج اللى بيميلوا للكتمان ومش بيتكلموا عن اللى بيحسوا بيه من ناحية العلاقه الحميمه بيعانوا من ضغوط داخليه شديده واللى بينعكس سلبا على ردود فعلهم فى المواقف اليوميه المختلفه ، وبالتالى بتزيد المشاكل الزوجيه على حاجات تانيه ومش مستاهله .

ستات كتير بتحس بالخجل والخوف من التعبير عن تخيلاتهم ورغباتهم اللى بتخص العلاقه الحميمه وتسكت الزوجه ومتقولش عن اللى جواها ، عشان جوزها ميحسش بالاحباط والفشل فى اشباع رغبات زوجته واسعادها ، وممكن كمان توهمه انها فى منتهى السعاده والرضا واللى بيسبب ليها اضرار نفسيه كبيره وبيخليها دايما عصبيه ومتوتره بسبب اظهارها عكس اللى جواها .

وكمان فى ازواج بيتكسفوا من طلب أوضاع أو حركات معينه فى العلاقه الحميمه عشان خايف ان مراته ترفض التغيير ، وتكون النتيجه فى النهايه زوجين مش راضيين عن علاقتهم وبيظهروا عكس ده ، مع ان الموضوع فى منتهى البساطه ، كل واحد منهم يشيل الخجل لان الخجل هو العدو الاول للعلاقه الزوجيه .

ممكن واحده تسأل .. ازاى اصارح جوزى باللى جوايا ؟
اولا : لازم يكون الزوجين على قدر كبير من الوعي والتفاهم والثقه المتبادله والا هتتحول الصراحه بينكم من نعمه الى نقمه ، عشان كده اهتمى ان تكون علاقتك بجوزك قويه وأكتر حميميه وكمان لازم تعرفى طبيعة شخصيته كويس عشان تختارى الطريقه المناسبه للكلام معاه فى الموضوع ده .
أحسن وقت لمصارحة جوزك باللى عايزاه هو وقت ممارسة العلاقه نفسها ومن غير أى كلمه منك ، وجهى بس جوزك باللى بتحبيه بلغة الجسد أو ايماءات العين وعرفيه اد ايه بيشتاق ليه كل جزء فى جسمك .

وضرورى كمان تتكلموا عن مدى رضاكم عن العلاقه بس عليكوا تختاروا الوقت المناسب عشان تعرفوا بعض باللى بتحبوه واللى مش بتحبوه فى علاقتكم الخاصه ، راقبى حالة جوزك المزاجيه واختارى وقت يكون فيه صافى الذهن وفى حاله مزاجيه كويسه تسمحله يتقبل الموضوع من غير حساسيه .
وكمان ضرورى تختارى الطريقه المناسبه للتعبير عن نفسك ومتتكلميش بطريقه جاده تحسسه ان فى مشكله كبيره عشان ميحسش جوزك بالتقصير والاحباط ، واتكلمى معاه بشكل غير مباشر وبلطف ونقى كلامك بعنايه ، فكلمه واحده غلط ممكن تدمر اى علاقه مهما كانت قويه .

الثقه أساس نجاح اى علاقه ، والصراحه هى الاساس اللى بتتبنى عليه الثقه دى ، عشان كده افتحى قلبك لجوزك وصارحيه بكل اللى انتى عايزاه واتكلموا مع بعض كاصدقاء من غير حواجز ، عشان حياه زوجيه أكتر سعاده .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

10 أكاذيب يقع فيها الأزواج السعداء

10 أكاذيب يقع فيها الأزواج السعداء جوزك بيكدب عليكى ؟؟ 🙄 دايما بتشك الزوجه بان …