حيل بسيطه لمنزل خالى من الحشرات صيفا

حيل بسيطه لمنزل خالى من الحشرات صيفا

فى ناس كتير بتحب فصل الصيف عن الشتا ، لكن فصل الصيف ليه مشاكل كتير اللى متقلش ازعاج عن برودة الشتا الجامد ، واكتر حاجه بتزعج ربات البيوت فى فصل الصيف هيا ظهور الحشرات فى البيت زى الدبان والناموس والنمل والصراصير .
ظهور الحشرات فى البيت مش معناه انك مش قادره تتخلصى منها نهائى انما تقدرى تعملى ده على مرحلتين هما الوقايه والمكافحه .

ازاى وقاية بيتك من ظهور الحشرات فى الصيف :

1. حافظى على النضافه :
_ أغسلى الاطباق فورا ونضفى بعد ماتطبخى الاكل .
_ احفظى المواد الغذائيه زى الدقيق والسكر فى عبوات محكمة الغلق من البلاستيك أو الأزاز .
_ احفظى الخضار والفاكهه فى التلاجه لانها مصدر جذب للدبان .
_ نضفى الارضيات وامسحيها دايما ويفضل تعملى ده كل يوم فى المطبخ .
_ اتخلصى من الزباله يوميا ومتخليهاش تبات فى البيت .

2. حافظى على الجفاف :
_ متسيبيش تجمعات ميه فى حوض المطبخ أو فى البانيو أو أرضيات الحمام لانها بتكون البيئه المثاليه للصراصير .
_ أتأكدى من عدم وجود تسريب من الحوض لان الرطوبه فى المطبخ الموجوده تحت الحوض ممكن تكون مخبأ مثالى للصراصير .

3. سدى الشقوق الموجوده فى الحيطان :
سواء كانت صغيره أو كبيره وممكن تستعملى الاسمنت الابيض وتعملى ده .

4. اتاكدى من عدم وجود مكان يدخلوا منه :
_ اقفلى باب البيت كويس ومتسيبهوش مفتوح ابدا.
_ أتأكدى من حالة السلك الواقى الموجود على الشبابيك ومتتأخريش فى تغييره لو كان مقطوع .

مكافحة الحشرات المنزليه فى الصيف والتخلص منها :
بيعتمد ناس كتير حول العالم على المبيدات الحشريه كوسيله للقضاء على الحشرات ، لكن الدراسات تيقنت فى السنوات الاخيره من ضرر المبيدات الحشريه على صحة الانسان وخصوصا الاطفال ، عشان كده الناس بتدور على وسائل طبيعيه لمكافحة الحشرات المنزليه بطريقه امنه .
من أشهر وسائل المكافحه الطبيعيه الاعشاب والنباتات الطبيعيه كوسيله أساسيه بيستعملها كتير من الناس فى الموضوع ده ، رش عصير اللمون أو الخل فى مسار النمل كفيل بالقضاء عليه ، وكمان ورق النعناع ، وكمان ريحة اللمون من الروايح المزعجه جدا للناموس وممكن زراعة عشبة اللمون والنعناع فى أصيص صغير وتحطيهم جنب الشباك .
وممكن كمان تحطى نبات اللافندر والريحان والروزمارى لطرد الدبان .

من الوسايل الفعاله كمان وضع شوية قرفه أو اللافندر أو الروزمارى أو القرنفل فى أكياس صغيره وتعلقيها جوه دواليب المطبخ أو مع الهدوم الشتويه المخزنه .
الريحان كمان طارد للبق أو حشرة الفراش .

وفى كمان بعض المصايد الطبيعيه اللى ممكن تستعمليها للتخلص من الحشرات المنزليه ، حطى شوية عسل جوه برطمان وحطى قمع من الورق فى البرطمان وهينجذب الدبان كتير على العسل وبعد دخوله القمع هيعلق فى العسل ومش هيعرف يخرج منه .

بالنسبه للنمل ، ممكن تحطى فتافيت أكل مضاف ليها مبيد حشرى قريب من مستعمرة النمل ويجى ينقل النمل الأكل للمستعمره ويتسمم بالتدريج لحد مايتقضى عليه .

وممكن كمان استعمال عقار الاكتومثرين والخاص بعلاج الجرب كوسيله للتخلص من النمل ، حطيه فى بخاخه وخففيه بالميه ورشى المحلول فى أماكن وجود النمل .

وممكن كمان تستعملى عجينه مكونه من اللبن البودره والسكر البودره وحمض البوريك من الصيدليه ، ودى وسيله امنه جدا للتخلص من الصراصير وممكن استعمالها فى الوقايه أو المكافحه .

فى بعض الاوقات بتحتاجى للجوء للمبيدات الحشريه متترديش فى ده بس خدى احتياطاتك كامله .
ويكون أحسن تستعملى المبيدات فى حالة السفر ويتقفل البيت كويس عشان يساعد على تركيز تأثير المبيدات مع تفادى حدوث تأثير على الانسان ولما تفتحى البيت لازم تنضفيه كويس اوى واستعملى ميه وصابون كتير لازالة اثار المبيدات .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

اهمية الاستحمام فى نهار رمضان

اهمية الاستحمام فى نهار رمضان قد يلجأ العديد إلى الاستحمام في نهار فصل الصيف على …