حواديت ماما .. القطه البنى

حواديت ماما .. القطه البنى

“كان فيه مرة قطة لونها بني، وكانت عايشة مع نونة جميلة..

كل يوم النونة تصحى الصبح وتجهز الفطار لنفسها وكمان للقطة، تعمل للقطة كوباية حليب جميل تشربه القطة وتفطر النونة ويلبسوا بسرعة علشان يلحقوا اليوم من أوله.

تنزل النونة والقطة الحديقة الخضراء يلعبوا بالكورة ويجروا ويتنططوا ويغنوا ويرقصوا، لغاية ما يتعبوا خالص وماما تقول لهم يلا بينا نروح البيت، أول ما يوصلوا بيتهم الجميل يجروا يغيروا هدومهم ويغسلوا إيديهم ووشهم ورجليهم وماما تحضر لهم الغداء.

القطة بتاكل ايه؟ عيش ومياه، والنونة تاكل خضار ورز ولحمة.

وبعد ما يغسلوا إيديهم وسنانهم بعد الأكل يدخلوا الأوضة يلعبوا بالألعاب وكل ما يخلصوا من لعبة يرجعوها مكانها تاني وماما تقولهم برافو عليكم.

ولما ييجي الليل يشربوا الحليب الدافي ويغسلوا سنانهم، وكل واحد يروح على سريره ويتغطى بالبطانية بتاعته.

القطة تقول للنونة: تصبحي على خير يا نونة.

والنونة ترد عليها: وإنتِ من أهله يا قطتي”.

ودي كانت الحكاية اللي بنحكيها كل يوم قبل ما نام مع جوجو، ولو مرة محكيناش الحكاية هي اللي تفكرنا، وتبدأ الحركات الخبيثة للهروب من النوم زي مثلا: “احكي تاني يا ماما”، ولما يحصل استجابة ندخل في دايرة لا تنتهي من حكاية القطة البني.

النوم رحلة صعبة جدًا مع الأطفال، ومش عارفة امتى هييجي اليوم اللي تنام جوجو فيه لوحدها في سلام وأمان وتحب النوم كده زي مامتها وتبطل تهرب منه، بس الروتين والقصص والحكاوي بيفرق جدًا وبيهون كتير من الرحلة الصعبة دي.

وإذا كان فيه نصيحة النهاردة، فهي إنكوا تعودوا ولادكم على حكاية قبل النوم، هتفرق جدًا في فهمهم لفكرة توقيت النوم ومكانه، وكمان هتقوي علاقتهم معاكم، بالإضافة إلى كل النصايح اللي مبيتقبلوهاش منكم وهيتقبلوها من الحكاية، زي حكاية القطة البني اللي جوجو حبتها فبقت بتعمل زيها بشكل تلقائي.

#دكتور_مفيد
#روشتة_دوت_كوم
#الدواء_بقى_أونلاين

 

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

حواديت ماما .. النور قطع

حواديت ماما .. النور قطع الحقيقة .. و أنا بكتبلكم حكاية النهاردة، كنت ناوية أكلمكم …