صيام الحامل فى الشهور الأولى

صيام الحامل فى الشهور الأولى

بتلعب التغذيه فى فترة الحمل دور مهم ، وازاى نتعامل مع صيام الحامل فى رمضان خصوصا فى الشهور الأولى من الحمل ؟

ممكن للحامل فى الشهور الأولى انها تصوم ؟
ده أول سؤال اللى هيخطر على بالنا لما نتكلم عن الحامل والصيام والاجابه عليه مش قاطعه لأن الاطباء متفقوش على اجابه واحده ولسه الموضوع ده مثير للجدل ، فقدرة الست الحامل على الصيام وعدم وجود اى مانع صحى أو أى اعراض خطيره هى اللى بتسمح ليها بالصوم ، وأباح الاسلام للحامل الصيام لو كان الصيام مش بيسبب أى ضرر ليها أو للجنين ، والضرر ده بيحدده الدكتور عشان كده لازم ناخد رأى الدكتور قبل اتخاذ قرار الصوم عشان نستبعد أى مخاطر ممكن يتعرض ليها الجنين بسبب الصيام ولو مفيش أى موانع فالدكتور بيسمح بالصيام .

ايه هيا المضاعفات اللى ممكن تواجه الحامل فى الشهور الأولى وقت الصوم ؟
ممكن تحس بعض الستات الحوامل بقوة جسديه تخليها تقدر تصوم لكن عند البعض ممكن تظهر بعض المضاعفات زى الشعور بالاعياء والتعب والغثيان وده بسبب هبوط ضغط الدم الطبيعى فى الحمل واللى بيسبب الشعور بالهبوط والتعب ، والصوم بيزيد من الاعراض دى وكمان الستات الحوامل متعرضين للأغماء وقت الصوم وممكن يحسوا بشعور عام سئ اكتر من غيرهم من الستات .

تعمل ايه الحامل لو حست بدوخه شديده ، غثيان ، وبعدين بدأت بالتقيؤ ؟
ساعتها لازم تتوقف عن الصيام فورا ، وتشرب ميه وترتاح ولو محستش بتحسن تروح للدكتور وتتشاور معاه عن امكانية الاستمرار فى الصوم .

تتصرف ازاى بعد مايخلص ساعات الصوم ؟
_ تبدأ الفطار بكوباية ميه أو لبن خالى الدسم مع 3 تمرات صغيرين أو أى واحدة فاكهه .
_ وبعد كده تشرب كوبايه من الشوربه عشان تهيئ المعده وتنبهها لاستقبال الأكل .
_ لازم تهتمى بانك تاخدى وجبه غذائيه صحيه متوازنه وشامله الاحتياجات وتحتوى على الكميه الكافيه من السعرات الحراريه .
_ تناول المكملات الغذائيه الضروريه .
_ شرب السوايل بحوالى 3 لتر على الأقل يوميا وتفضيل الميه على السوايل التانيه .
_ تناول كذا وجبه صغيره فى الفتره اللى بعد الفطار ولحد السحور .

ياترى فى توصيات خاصه لوجبة السحور ؟
_ تأخير وجبة السحور لفتره قريبه من الامساك .
_ شرب كميات كافيه من الميه .
_ لازم وجبة السحور يكون فيها الكربوهيدرات المعقده واللى بتزود الجسم بالطاقه زى العيش الأسمر أو الحبوب الكامله .
_ تناول البروتين اللى بيأخر الشعور بالجوع زى البيض واللبن ومشتقاته أو البقوليات .
_ الحرص على تناول الخضار والفاكهه والأغذيه العاليه بالألياف واللى بتقى الامساك وبتمد الجسم بالعديد من المعادن .
_ تجنب تناول الاطعمه الغنيه بالدسم زى الوجبات السريعه أو الحلويات الغنيه بالسكريات لانها بتزود الشعور بالعطش والجوع .

ايه هيا الاغذيه اللى على الحامل تجنبها ؟
_ الاسماك وخصوصا الاسماك الدهنيه عشان نتجنب الزئبق اللى بيأذى تكوين الجهاز العصبى للجنين والامتناع التام عن الاسماك اللى فيها نسب عاليه من الزئبق زى الماكريل .
_ تجنب تناول السوايل اللى فيها كافيين بكميات عاليه زى القهوه والمشروبات الغازيه .
_ تجنب المشروبات المسكره والحلويات .
_ تجنب الاكل المالح زى المخلالات والأكل المقلى والأكلات الدسمه غير انها مش صحيه فهيا بتزود من الشعور بالجوع والعطش .

امتى لازم تتوقف الحامل عن الصوم ؟
_ الشعور بالدوخه ، الاغماء ، الضعف أو التعب والجفاف .
_ الغثيان أو التقيؤ .
_ فى حالة عدم زيادة الوزن أو فقدان الوزن .
_ لما تحسى بالصداع أو ارتفاع درجة الحراره .

امتى بيمنع الدكتور بعدم صيام الحامل ؟
بتعانى بعض الستات فى الشهور الأولى من الحمل من التقيؤ وبيفقدوا سوايل كتير ، الستات دول يستحسن انها متصومش عشان منع حدوث الجفاف ، وكمان الستات اللى بتعانى من احد الامراض المزمنه زى السكر أو ارتفاع ضغط الدم والامراض اللى بتحتاج تناول ادويه معينه ، وفى كل الحالات استشيرى الدكتور بتاعك ولو قرر بانك تمتنعى عن الصيام يبقى لازم تلتزمى بتعليماته وممكن كمان تستشيرى رجل دين فى الموضوع ده .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

ماسكات طبيعيه لبشره مشرقه بدون مكياج فى رمضان

ماسكات طبيعيه لبشره مشرقه بدون مكياج فى رمضان ممكن تخلى بشرتك رائعه وكلها نضاره واشراق …