الحالات الطبية

7 نصائح لصيام امن على مرضى القلب

7 نصائح لصيام امن على مرضى القلب

بالرغم من السعاده اللى بيحس بيها العالم بسبب حلول شهر رمضان الكريم ، الا ان فى بعض الفئات اللى بيراودها القلق من الصيام وبيملاها الحزن بسبب شكها فى انها مش هتقدر على الاستمتاع بشهر الصوم والروحانيات .

ومن الفئات دى اللى بيعكر المرض صفو فرحتها برمضان هما مرضى القلب عشان كده قدم أطباء القلب بشرى ساره للفئه دى من المرضى بخصوص الصيام ، وبيأكدوا ان الصيام مش بيسبب أى خطر على مريض القلب زى مابيتوقع ناس كتير لكنه ممنوع على فئه قليله جدا من مرضى القلب ، والصيام بيساعد على تدفق الدم للقلب وبيساعد على تحسن القلب ورفع كفاءته ، وده راجع لدراسات حديثه كتيره .

وأتبع النصايح دى عشان صيام صحى وفطار بدون مشاكل :

1. الفطار على مراحل :
على مريض القلب انه يلجأ لحيلة تقسيم وجبة الفطار على مراحل ومياكلش وجبة الفطار كامله فى نفس الوقت وضرورى يهتم بالخضار الطازه والعصاير الطبيعيه والأغذيه اللى ليها ألياف طبيعيه .

2. أحذر الأطعمه الدسمه :
الابتعاد عن الأطعمه الدسمه المشبعه بالدهون ضرورى لمريض القلب فى رمضان لأنها بتسبب ضرر كبير على القلب ومعروف عنها ان الدهون بترفع نسبة الكوليسترول فى الدم وبتسبب ترسبات فى الشرايين تعوق وصول الدم من والى القلب .

3. ارشادات الطبيب :
الالتزام بالأدويه والتعليمات اللى بيحددها الطبيب المعالج يعتبر من أهم طرق الوقايه من أى ضرر فى الصيام وكمان الطبيب هو اللى بيحدد قدرة المريض على الصيام من عدمه .

4. احترس من الشمس :
على مريض القلب تجنب التعرض لأشعة الشمس المباشره خاصة وقت الذروه فى رمضان لأن ده ليه اثار سلبيه بتتعلق بزيادة نسبة التعرق وفقد المزيد من الميه وقت الصيام .

5. صلاة التراويح :
كتير من الصايمين بيصيبهم الخمول والكسل بعد الفطار ، وعلى مريض القلب تجنب النوم بعد الأكل على طول ويهتم بممارسة نشاط بدنى بسيط وأحسن حاجه هيا صلاة التراويح .

6. وجبة السحور :
لو كنت من مرضى القلب يبقى عليك تناول وجبه متوازنه فى السحور وتبعد عن المخللات وتكون الوجبه فيها أطعمه غنيه بالقيم الغذائيه العاليه زى البروتينات .

7. فحص طبى قبل رمضان :
تطورات حالة مريض القلب محتاجه للمتابعه المستمره عشان كده لازم يعمل فحص طبى شامل قبل رمضان عشان يعرف تطورات الحاله وتحديد مدى القدره على الصايم .

#دكتور_مفيد
#روشتة_دوت_كوم
#الدواء_بقى_أونلاين

اظهر المزيد

heba mohamed

انا هبه ويارب اقدر افيدكوا .. وأكون خفيفه على قلبكوا … ودايما احب اشوف ارائكوا وتعليقاتكوا وتتواصلوا معايا دايما

مقالات ذات صلة

إغلاق