تأثير الصيام خلال الحمل على الجنين

تأثير الصيام خلال الحمل على الجنين

ممكن للحامل انها تفطر فى شهر رمضان بسبب ضعفها وزيادة العبء على جسمها فى الفتره دى لكن ستات كتير حوامل بتحب تصوم فى رمضان لو لقوا نفسهم قادرين على ده ، وفى حوالى 75% من الحوامل حولين العالم بيصوموا رمضان ، لكن هل يعتبر الصيام عبء على الأم بس ولا أنه بيأثر كمان على صحة الجنين ونموه ؟

اتعملت عدة دراسات لتقييم وضع الطفل عند الولاده ومعرفة تأثير الصيام على الأطفال اللى صامت امهاتهم فى فترة الحمل مقارنه بالأطفال اللى أمهاتهم مصاموش وقت الحمل .

ولقوا أن مفيش تأثير يذكر للصيام على صحة الطفل ووزنه وطوله وقت الولاده .

بعض الدراسات اشارت لنقص وزن الطفل عند الولاده فى حالات صيام الأم خلال الأشهر التلاته الأولى من الحمل لكن بمعدل طفيف جدا ميتخطاش 1.5% من متوسط الوزن عند الولاده ، واشارت دراسات تانيه لحدوث نقص طفيف فى متوسط الطول لو صامت الأم خلال الأشهر التلاته الأولى من الحمل، لكن مره تانيه بصوره مش مؤكده .

أمتى بيسمح للأم بالصيام فى فترة الحمل ؟
قرار صيام الست الحامل هو قرار لازم الرجوع فيه للدكتور وغالبا بيقرر الدكتور امكانية الصيام من عدمه بالأعتماد على :
_ حالة الأم الصحيه العامه قبل الحمل .
_ مرحلة الحمل .
_ عدد ساعات الصيام .

ازاى تستعدى للصيام لو كنتى حامل ؟
1. المتابعه الدوريه فى الحمل والتأكد من عدم الاصابه بسكر الحمل أو الأنيميا .
2. تقليل استهلاك المشروبات اللى فيها الكافيين تجنبا للاصابة بالصداع فى فترة الصيام وميزدتش استهلاكك على كوبيتين قهوه فى اليوم فى فترة الحمل عموما .
3. محاولة تخفيض عدد ساعات الشغل فى رمضان أو تاخدى اجازه .
4. تسجيل اللى بتاكليه من أكل وسوايل بعد الفطار عشان تتأكدى من كفايته وخصوصا السوايل .
5. عدم التردد فى الفطار فورا لو حسيتى بهبوط أو تعب .

أمتى لازم تستشيرى الدكتور فى امكانية استكمال صيامك ؟
_ لو بدأتى فى فقدان الوزن .
_ لو قلت كمية البول أو لقيتى لونه داكن لانه من علامات الجفاف .
_ لو اتكرر اصابتك بالصداع أو اتصبتى بالحمى .
_ لو حسيتى بالغثيان أو القئ .
_ لو قلت حركة طفلك .
_ لو حسيتى بانقباضات مؤلمه لأنها ممكن تكون علامه على ولاده مبكره .
_ لو حسيتى بالدوخه أو فقدتى الوعى أفطرى فورا .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

حواديت ماما .. انتى لسه شوفتى حاجه ؟

حواديت ماما .. انتى لسه شوفتى حاجه ؟ محاولات تصدير الطاقة السلبية واحدة من أغرب …