خطوات ميزانية عيد ناجحه

خطوات ميزانية عيد ناجحه

العيد عايز ميزانيه خاصه غير مصروف البيت العادى ، عشان نشترى لبس العيد للأطفال والكحك والبسكويت والعيديات والفسح ، وفى ظل غلاء الاسعار دلوقتى ، فكرتى ازاى تدبرى ميزانية مناسبه لمصروفات العيد ؟ وازاى هتخليها اقتصاديه وتحافظ على دخل الأسره ومتتخطيهاش ؟ الأفضل انك تبدأى ده بدرى .

ودول 7 نصايح هتساعدك على تدبير ميزانية العيد بدرى :

1. حاولى تعينى مبلغ كل أسبوع أو حتى من مصروف البيت الشهرى لميزانية العيد وأدى الأوليه للبس الجديد وبعد كده الكحك والبسكويت .

2. مترهقيش نفسك فى رمضان بشراء مستلزمات لاحصر ولاداعى ليها من أكل وشرب ووفرى للعيد واتفقى مع جوزك على زياده صغيره للمصروف على حسب دخله فى موسم العيد .

3. اشتركى فى جمعيه مع الأهل والاصدقاء عشان يكون معاكى مبلغ هيساعدك تجيبى طلبات العيد لأولادك وبيتك .

4. اشترى احتياجات اسرتك من اللبس فى نهاية كل موسم للموسم ، عشان بيكون وقت التخفيضات وعينيها للعيد وبكده تقدرى تشترى اللبس بنص التمن تقريبا وهتوفرى فى ميزانيتها .

5. متشتريش كميات كبيره من الكحك والبسكويت واشترى علبه صغيره هتفى بالغرض ومش مهم انها تكون من أغلى المحلات والأهم طعمها يكون حلو ولو حتى مصنوعه فى البيت جنب فرحة العيد لأولادك .

6. غيرى مفهوم ولادك عن العيديه والمصروفات فبدل مايصرفوها كلها خليهم يحوشوا منها جزء للفقراء والمحتاجين وبكده تعم البركه فى بيتك ويتعلم ولادك الصغيرين الاحساس بالغير .

7. خصصى مبلغ صغير لعيديات الأقارب اللى غالبا بتترد تانى زيها وبالتالى مش هتكون عبء مادى عليكى .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

رائحة حديثى الولاده

رائحة حديثى الولاده الأطفال حديثى الولاده يفرز جسمهم رائحة مميزه تجذب البشر وخصوصا النساء . …