ضربة الشمس ، الوقايه والعلاج

ضربة الشمس ، الوقايه والعلاج

تعتبر ضربة الشمس حاله نادره وفى نفس الوقت خطيره ، ومينفعش بأى حال من الاحوال التقليل من اهميتها ولازم تصنيفها كحاله خطيره محتاجه علاج سريع ، وبيختلف تأثيرها من شخص للتانى وممكن تصيب شخص فتره معينه والتانى فتره أطول وللظروف المحيطه اهميه كبيره فى ده ، وبتكون أشد خطوره فى الاطفال منها عند الكبار وبيزيد خطورة التعرض ليها والاصابه بيها الجو المشبع بالرطوبه فكل مازادت نسبة الرطوبه وارتفعت درجة الحراره زادت احتمالية الاصابه بالحاله دى لان الجو الحار والرطب يسبب فشل عرق الانسان فى تبريد الجسم بسبب توقف مراكز تنظيم الحراره فى الدماغ عن العمل وبشكل مؤقت وبالتالى بترتفع درجة حرارة الجسم وتوصل لـ 40 درجه مئويه او اكتر واللى بيحتاج المعالجه الطبيه السريعه عشان تفادى حدوث مضاعفات ممكن توصل للوفاه .

أهم أسباب ضربة الشمس :
التعرض لدرجة حراره مرتفعه وخصوصا لما يكون الجو مصحوب برياح جافه او برطوبه عاليه وبيسبب ده ارتفاع فى درجة حرارة الجسم وكمان توقف العرق او انعدامه وبيصاحبه ضيق فى مجرى التنفس وبالتالى نقص الاكسجين عن اجهزة الجسم المختلفه .
وممكن تحصل ضربة الشمس لما بيتعرض الانسان للاجهاد وقت الشغل تحت حرارة الشمس وخصوصا العمال اللى بيشتغلوا فى العراء عشان كده لازم نتفادى الشغل تحت اشعة الشمس المباشره فى الايام الحاره وبتلجأ بعض الدول للعمل بليل لتفادى ده كله .

أهم أعراض ضربة الشمس :
الشعور بالتعب والارهاق والضعف العام.
ارتفاع في درجة حرارة الجسم، واحمرار في الوجه.
تشوش النظر، وجفاف الجلد.
ظهور الصداع وتقلصات عضلية.
الشعور بدوران (دوخان) مع استفراغ.
ارتباك مش واضح المعالم بيوصل لدرجة الهذيان وممكن يسبب فقدان الوعي.
تسارع في النبض وصعوبة في التنفس.
وممكن يكون فقدان الوعي هو أول أعراض ضربة الشمس.

علاج ضربة الشمس :
العامل الاهم فى العلاج هو تبريد الجسم مباشرة والعمل على هبوط درجة الحراره المرتفعه للوضع الطبيعى وبعد كده نقله للمستشفى ، واحسن طريقه لتبريد الجسم هو خلع الهدوم ولفه فى فوطه مبلوله ميه او ممكن تغطيس الجسم فى حوض ميه عاديه او بارده شويه ونحط مروحه قريبه من المريض ولما يوصل المريض للمستشفى بياخد سوايل وريديه وعلاج الاعراض المختلفه وبشكل سريع ولكن لازم نراعى عدم نزول حرارة الجسم عن الطبيعى .

ومعروف ان حرارة المريض ممكن متكنش مستقره لفتره طويله ممكن حوالى اسابيع بالرغم من شفائه من ضربة الشمس .

ومعروف كمان ان اهمال المريض وعدم معالجته حسب الاصول ممكن يسبب أذى دماغى او حتى الوفاه .

وممكن الوقايه من ضربة الشمس عن طريق تجنب العمل تحت اشعة الشمس المباشره وخصوصا فى الجو الحار وكمان تهوية الاماكن المغلقه وكمان تعويض الجسم عن السوايل المفقوده منه بفعل الحراره ولازم تجنب أكل الوجبات التقيله وكمان تغطية الراس عشان متتعرضتش بشكل مباشر لحرارة الشمس وده مهم جدا تغطية الراس للوقايه من ضربة الشمس .

ولازم نميز بين ضربة الشمس والاعياء الحرارى اللى بيصيب الانسان بسبب تعرضه لطقس حار وغير مألوف بالنسبه ليه واللى بيسبب نقص الميه والاملاح فى الجسم واللى بيتعبه من اعراض تكون أخف من أعراض ضربة الشمس وان كان بعضها بيشبه نفس الاعراض .

واخيرا لازم التأكيد مره تانيه ان الاطفال وكبار السن هما الاكتر ضرر من ضربة الشمس ولازم نراعى ده وقت علاج المرضى وناخد الحيطه والحذر لحمايتهم .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

4 انواع للصداع وطرق علاجها

4 انواع للصداع وطرق علاجها مهم انك تعرف نوع الصداع اللى بيصيبك عشان تقدر تتعامل …