ماذا يحدث لجسمك عند ممارسة اليوجا؟

ماذا يحدث لجسمك عند ممارسة اليوجا؟

جه الوقت عشان تنطلق وتجدد حياتك وتاخد الخطوه دى اللى أجلتها سنين فلو دخلت عالم اليوجا حياتك ولو لمره واحده كل اسبوع هتحس بتغيير رائع فى يومك وهيكون صعب اوى تسيبها بعد كده ، عشان كده تعالوا ننطلق بشوية نصايح عن اليوجا .
1. عليك بالتأمل العقلى عشان تكون حاضر فى اللحظه قدر الامكان :
بتحس انك مش قادر على التحكم فى عواطفك السلبيه وبتستفزك مواقف بعض الناس بسرعه ؟ وممكن كمان توصل لمرحلة تهرب فيها من مشاكلك وتدفنها جواك ؟ يبقى على طول مارس الـ mindfulness mediation
لأن النوع ده من التأمل بيعلمك ازاى تتأقلم مع الاحداث الايجابيه والسلبيه فى حياتك ، وزى مابتتعرض لمواقف سعيده وبتتعلم منها ، كمان تعرضك للمواقف الصعبه هيفيدك فى الحياه ، هما الاتنين ضروريين لاستمرار الحياه . والتيقظ بيدربك على التعامل مع كل مشاعرك وده لانك بتتعلم من الحزن زى مابتتعلم من الفرح ، وبننصح تجرب النوع ده من اليوجا وده لان مجتمعات كتير اتربت على عدم مواجهة الأحزان والهروب منها من غير تقبلها والوصول لدرجة التعايش معاها ، فلو هربت من اى تجربه قاسيه مرت عليك واقنعت نفسك بأن كله حاجه تمام ممكن يظهر الجرح ده تانى على هيئة أمراض جسمانيه او نفسيه فى المستقبل ، ويعتبر حضورك ذهنيا مع اللحظه الانيه ووعيك بيها هدف من اهداف اليوجا لان وضعيات اليوجا عباره عن حلقه متكامله بتعلمك ازاى تكون مرتاح مع الواقع وحاضره الان ، وتعتبر التقنيه دى من أسهل تقنيات التأمل اللى تقدر تمارسها بسهوله لانها مش محتاجه لمدرب بس كل اللى عليك تقعد مستقيم الضهر على كرسي او على الارض أو أختار اكتر قاعده بتريحك وأقفل عينيك واسمع انفاسك وحس بجسمك فى مكان هادى مفيهوش اى دوشه ، وبيعتقد بعض الناس ان التأمل العقلى يعنى انك تخلى عقلك فاضى خالص من كل الافكار وده مش صح لان التأمل هو مواكبة الواقع زى ماهوه ، فشويه هتحس انك قادر على التحكم بافكارك وابعادها وشويه هتحس بان افكارك بتجيلك من وقت للتانى وهتوصل مع الوقت لمرحلة تتقبل فيها شعور الحزن بسلام وهدوء .

2. عالج الاكتئاب باليوجا :
زى ما الاكتئاب مرتبط بالقلق فان اليوجا بتعلمك ازاى تكون متوافق وراضى عن كل المشاعر دى ومع الواقع وفى بعض الاوقات بيكون واقعك مختلف خالص عن الصور اللى بيرسمها خيالك بمساعدة ذهنك وبننصح بممارسة أى نوع من اليوجا لو صاحبك لفتره طويله شعور سلبى وتزود نفسك بالراحه والسلام .

3. مارس الفنياسا والين يوجا :
بننصح بممارسة الفنياسا كنوع من اليوجا وهى معناها الرقص مع النفس وكمان ممارسة ين يوجا وهيا من أروع الانواع اللى بتكون من خلالها فى وضعيه معينه لمدة 5 دقايق لانها بتقوي العضلات وبتصلك مع قلبك وبتفيد جسمك وكمان بتعلمك ازاى تتنقل من الوضع اللى مش مريح للوضع المريح .

نصايح خاصه :
دور على مدرب او مدربه ومركز تدريب مريح وروحله من غير تردد ومتقولش انك مش مرن لدرجه انها تؤهلك لممارسة اليوجا لأن اليوجا لكل الاجسام وكل الناس ، ومتمارسش اليوجا من اليوتيوب خصوصا لو كنت مبتدئ لانه من الافضل ليك ان يتابع المدرب حركتك ، وياريت منروحش عالم اليوجا لتحقيق هدف ضيق زى مثلا تعديل شكل الجسم او تصغير الخصر لان اليوجا هي نمط حياه وتغيير كلي لروحك وجسمك .

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

خطوات تقريب العائله فى رمضان

خطوات تقريب العائله فى رمضان رمضان فرصه كبيره للى عايزين التقارب عائليا ووجدانيا ويخليك تستغل …