مرض التوحد الاعراض والحلول

مرض التوحد الاعراض والحلول

فى عصر اتملى بعناصر التكنولوجيا ظهر مرض التوحد عند الاطفال بنسبه قليله بعد كده بدأ ينتشر وهو اضطراب عصبى سلوكى بسبب خلل فى وظايف الدماغ وبيظهر زى اعاقه فى النمو والتطور عند الطفل فى التلات سنين الأولى من العمر وبيستمر مدى الحياه والمرض ده مش بيسبب اعاقه جسديه او دماغيه وبيتم التخفيف منه عن طريق التدخل المبكر عشان ميحصلش تأخر فى النمو المعرفى والسلوكى وبيعانى الطفل التوحدى من مشاكل فى الاتصال والتواصل والتخاطب مع اللى حواليه وميعرفش يعمل علاقات اجتماعيه مع الاخرين ودى بتكون من الاعراض بالاضافه لمشاكل فى السلوك واللغه .

اعراض مرض التوحد :

_ السلوك الغير طبيعى :
من أهم الاعراض اللى بتظهر على الطفل المريض هى السلوكيات الغير طبيعيه وهي مش سهلة التحديد لأنها مش مجرد سلوك مختلف ، احيانا بتظهر اعراض التوحد على الطفل ويفسرها الأهل على ان الطفل طباعه هاديه ومن الاعراض كمان استقلال الطفل وعدم رغبته فى اى طلب ولو كانوا الأهل عارفين وفاهمين هيقدروا يكتشفوا العلامات بدرى واللى هيفيد فى سرعة العلاج .

_ حركة الجسم :
من أهم أعراض التوحد ان الطفل يدور حولين نفسه او يهتز فى تكرار او يمرجح ايديه .

_ عدم تكرار الكلمات والأصوات :
من العلامات المهمه برضه عدم تكرار الطفل للكلام او تقليد الاصوات لحد العام الأول .

_ التأثير على وظائف المخ :
بيأثر التوحد على اجزاء معينه فى المخ والاجزاء دى بتقدر تتحكم فى عواطف الجسم والحركات اللى بيقوم بيها وكتير من الاطفال اللى عندهم توحد بيكون عندهم راس أكبر فى الحجم من الحجم الطبيعى . وممكن يكون السبب فى مشكله معينه فى نمو الدماغ او جينات وراثيه منقوله للطفل عن طريق العيله وده ممكن يكون سبب فى وجود مشكله فى وظايف المخ .

_ التواصل الاجتماعى :
الاطفال الأكبر سنا بتختلف عندهم اعراض التوحد لانها بتختلف وتتنوع كل مااتقدم الطفل فى العمر ولكن فى الاساس بتجتمع كل الاعراض حولين عدم القدره على الكلام او التواصل الاجتماعى .

_ الوحده :
بيحس الاطفال اللى بيعانوا من مرض التوحد من وجود شعور قوى عندهم بالوحده وهما دايما بيفضلوا التواجد لوحدهم لان التواصل عندهم مع الاخرين مش بيكون سهل عليهم وبالنسبه للأطفال مرضى التوحد بيأثر فيهم عدد الاصدقاء ومش نوع الصداقه اللى بتجمعهم لانهم بيفضلوا الاصدقاء الموجودين فى الحفلات .

– عدم الاستجابة للأضواء والاصوات :
الطفل المصاب بالتوحد بتكون استجابته للأصوات العاليه او الأضاءه أو الالام مش طبيعيه واحيانا بيستجيب للألم بطريقه مش طبيعيه وبيظهر عليه عدم الشعور بالألم او ممكن الشعور القليل بالألم ولكن الاصوات المزعجه بتضايقه وبتغضبه وممكن كمان تؤلمه .

ومن اعراض التوحد كمان :
حب العزله والابتعاد عن المحيطين ويعيش المتوحد جوه عالمه الخيالى ومش بيجذبه اللعب مع الأطفال اللى من سنه .
عدم مشاركة الاخرين مشاعرهم وعدم احساسه بالألم .
عدم الاستجابه لنداء الاخرين وكأنه مش سامعهم .
وجود تأخر فى النطق والتعبير عن اللى هو عايزه مقارنه بالاطفال اللى من عمره .
مبيحبش الطفل حد يحضنه وبيحاول الهرب والانكماش على نفسه .
مبيقدرش الطفل يركب الجمل ( الكلمات يعنى ) وممكن ينسى اللى كان بيقوله ويكرر بعض الكلمات كتير .
بيتكلم بطريقة الترنيم وبصوت موسيقى وبيعيد نطق بعض الكلمات بطريقه موسيقيه .
بيكرر بعض الحركات طول الوقت زى الاهتزاز و الدوران .

علاج مرض التوحد :
مفيش علاج شافى من مرض التوحد عن طريق الادويه والعقاقير لعدم معرفة السبب الرئيسى المسبب للتوحد وبسبب وجود اضطرابات كتير وقت المرض ده ولكن بيتم تأهيل المصاب والأهل والبيئه المحيطه للتأقلم مع الحاله وبيتم تعليم الطفل السلوكيات المناسبه وطريقة التعامل مع غيره وكمان بيتم تعليمهم الاعتماد على النفس ومحاولة نطق الكلمات والحروف وتكوين الجمل والتعبير عن اللى بيدور فى ذهنه .

التعامل مع مريض التوحد :

اولا: تقدير الحاله النفسيه ، الطفل التوحدى هو انسان اولا واخيرا وقبل اى حاجه فى اللى بيفرحه ويخليه سعيد وفى اللى بيزعله ويخليه كئيب حتى ولو كنا نجهل السبب فشأنه شأن الطفل العادى ممكن يكون فى حاله نفسيه وجسديه طيبه فيتعاون مع الاخرين وممكن يكون فى اوقات تانيه فى حاله نفسيه وجسديه سيئه وميتجاوبش مع اللى بيتعامل معاه ويرفض التعاون معاه .

ثانيا : التركيز على التواصل : الانسان مش بيكون انسان الا بوجود الاخرين ومش بيكتسب مدى انسانيته الا بمدى تواصله معاهم عشان كده مهم اننا نركز فى تعاملنا مع الطفل التوحدى على تنمية التواصل البصرى واللفظى ومش كفايه اننا ندي الطفل اللى هو عايزه بمجرد نجاحه فى مهمه اتطلبت منه والصح اننا مندهوش الحاجه دى الا لما يبص فى وشك وده عشان نشجعه على النظر فى وش اللى بيتكلم معاه وبالنسبه للأطفال اللى عندهم القدره على الكلام لازم نشجعهم على الكلام عشان ياخد اللى هو عايزه .

ثالثا: محاولة تقريب ودمج الطفل مع اللى فى سنه ، بيميل الاطفال التوحدين للتعامل مع الكبار والاتصال بيهم ويكون تعاملهم مع الكبار أسهل من تعاملهم مع الاطفال الصغيرين وده بيرجع لتفهم الكبار للطفل التوحدى او بسبب تعوده عليهم او ممكن لانهم بيحاولوا تطويع نفسهم لخدمته عشان كده لازم نقرب الطفل التوحدى من الاطفال التانيين ونعلمه ازاى يلعب ويتفاعل معاهم .

رابعا : شغل الطفل عن الحركات النمطيه ، اغلب الاطفال التوحديين عندهم حركات نمطيه مبتكره بيعملوها ليل نهار وبيضايقوا لما تقولهم متعملوش كده او تحاول توقفهم عشان كده لازم ننهاهم مش بالكلام او بأمر التوقف عنها او بالعافيه ومعاقبتهم لما يعملوها انما ننهاهم عنها ونمنعها باننا نشغلهم دايما ومنسبهمش مع نفسهم يكرروا الحركات دى والافعال النمطيه .

خامسا : تنمية الثقه بالنفس والاستقلاليه ، بيعانى الطفل التوحدى من فقدان الثقه ولازم اننا نشجعه على عمل كل حاجه بنفسه .

سادسا : تدريب الطفل على الدفاع عن نفسه ، الطفل المصاب بالتوحد مش بيقدر فى الغالب الدفاع عن نفسه ومش بيقدر التعرف على مصدر الخطر وحتى انه مش بيقدر انه يرجع اللى اتاخد منه ولو كان أكله والموضوع ده بيزعل أهالى الاطفال التوحديين جدا وعشان كده مهم اننا ندربه على ازاى يرد العدوان وازاى يهرب من مصدر الخطر وازاى يدافع عن نفسه وازاى يتعامل مع اللى بيعترض طريقه .

سابعا : التدريب على اللعب ، اثبتت الابحاث والدراسات ان للعب دور مهم فى النمو فهو أسلوب وطريقه لتفريغ الانفعالات وعلاج الاضطربات الانفعاليه وعشان للعب الاهميه دى فى حياة الانسان يبقى من المهم اننا ندرب الطفل التوحدى على اللعب وازاى يستمتع بيه ومشاركة الاخرين فى اللعب وبعض الاطفال التوحديين بيفضلوا الالعاب التركيبيه والميكانيكيه وتنظيم الالعاب فى صفوف وأشكال منظمه وعلينا استغلال ده فى تدريبهم وتعليمهم .

ثامنا : توحيد طرق التعامل ، ممكن ميحصلش تقدم فى حالة الطفل التوحدى بالرغم من اتباعنا لمعظم المبادئ والنصايح وبيرجع السبب فى اوقات كتير الى ان اسلوب التعامل فى البيت بيختلف عن اسلوب التعامل فى المدرسه او المركز او المؤسسه عشان كده لازم يكون الاسلوب اللى بنتعامل بيه مع الطفل التوحدى اسلوب واحد فى كل مكان موجود فيه الطفل .

تاسعا : التأكد من فهم الطفل للى بنطلبه منه وقدرته على النجاح فيه، لما بنطلب من الطفل مهمه معينه او يعمل اى نشاط فعلينا اولا نتأكد من مدى فهم الطفل لينا واللى بنطلبه منه لأنه احيانا بيكون رفض الطفل او مقاومته عند التدريب مش بيرجع لعدم رغبته فى التعاون مع معلمه او والده او لمجرد الرفض انما بيكون لعدم فهمه للى بنطلبه منه .

عاشرا : تدريب الطفل على تقبل التغيير ، لو عايزين نبعد الروتين فى التعامل مع الطفل التوحدى يبقى لازم اننا نأهل الطفل للتعامل مع التغيير وتقبله ، فعلينا اننا نخلى الطفل يعرف ان عليه انه يتعامل مع الواقع زى ماهوه وعلينا اننا نشرح ونوضح ليه هنعمل ايه قبل مانعمله وعشان كده لازم نبدا بالتغييرات البسيطه فى البدايه بعد كده بالتغييرات الكبيره .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

حواديت ماما .. انتى لسه شوفتى حاجه ؟

حواديت ماما .. انتى لسه شوفتى حاجه ؟ محاولات تصدير الطاقة السلبية واحدة من أغرب …