بدائل طبيعيه للقهوه والشاى تساعدك على التركيز

بدائل طبيعيه للقهوه والشاى تساعدك على التركيز

بعض الناس مش بيعرفوا يعدوا يوم واحد من غير شرب القهوه أو الشاى ولكن لو دورونا شويه عن بدايل للكافيين طبيعيه أكتر ومش بتأثر على الحاله العقليه والجسمانيه للأنسان ، لقينا بعض الخيارات الجذابه اللى بتزود تنبهك وتركيزك من غير ادمان زى مابيحصل مع الكافيين .

تمارين الاطاله :
لو كنت بتحس بالرغبه فى النوم ومش بتعرف تركز قوم من على الكرسى وابدأ أعمل تمارين الاطاله ومفيش داعى للتمارين المعقده انما تمارين بسيطه زى محاولة لمس صوابع رجلك بدراعاتك مع شد جسمك وغيرها من التمارين اللى موجوده على اليوتيوب والتمارين دى هتحسس جسمك بالراحه وعقلك بالتنيه .

الارتواء :
عدم التركيز علامه من جسمك على انه محتاج اكتر من الميه وعندنا طرق للأرتواء :
اشرب 8 كوبايات ميه طول اليوم يعنى حوالى لترين وممكن تتحكم فى كمية الميه دى بأنك تحمل تطبيق للأندرويد يفكرك كل مده لشرب الميه .
فكر نفسك ان جسمك بيفقد الميه طول اليوم عن طريق العمليات الحيويه زى التبول والتعرق والرضاعه الطبيعيه عشان كده كل ماتعمل حاجه من الحاجات دى اشرب بعدها الميه على طول .
اعرف عن طريق احد التطبيقات او المواقع كمية الميه اللى بيحتاجها جسمك بالظبط بصوره يوميه وهي بتعتمد على الوزن والجنس والعمر وحاول الالتزام بالكميه دى .

فيتامين “ب”:
فيتامين “ب” المعقد بيساعد جسمك فى امتصاص الأكل اللى بتاكله وبالتالى بيحصل جسمك على مواد مغذيه أكتر وأفضل أنواع فيتامين “ب” للتنبيه والتركيز فيتامين “ب6” وفيتامين “ب12″، اللى بيسبب نقصه التعب والوهن وفقدان القدره على التركيز وممكن كمان تاخد مكملات غذائيه لفيتامين “ب” بعد استشارة الطبيب لمعرفة الجرعة المناسبة ليك، او تاخده بصوره طبيعيه وهو موجود فى البيض والمكسرات والبقوليات واللحمه .

الأكل المتوازن :
اختيار الاكل المتوازن لحميتك الغذائيه والابتعاد عن الاطعمه المحفوظه والسريعه والاتجاه اكتر للفواكه والخضار الطازه بيساعد الدماغ على ادائه لوظائفه الحيوي ولازم كمان نهتم بتقليل الدهون المشبعه فى الاكل والكوليسترول ونخلى السعرات الحراريه فى الأكل فى حدود الطبيعى مش زايده بصوره كبيره او قليله بشكل منهك للجسم .

ومن الاكل اللى بننصحك بيه بذور الكتان والبندق والأفوكادو، لانها مصادر رائعه لمضادات الاكسده والاميجا 3 وكمان البروكلى والقرنبيط لانهم مصدر للألكولين اللى هيساعدك على التركيز ويحسن الذاكره وزيت جوز الهند اللى بيحسن الذاكره لانه بيحتوى على الكيتونات اللى بتجدد خلايا الدماغ واعصابه ، واتناول حوالى 20 جرام من زيت جوز الهند بصوره يوميه هيحميك من كتير من الامراض العصبيه وبيعالج اى ضرر يحصل للدماغ .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

خطوات تقريب العائله فى رمضان

خطوات تقريب العائله فى رمضان رمضان فرصه كبيره للى عايزين التقارب عائليا ووجدانيا ويخليك تستغل …