تعرف على مثيرات حساسية الجيوب الانفيه

تعرف على مثيرات حساسية الجيوب الانفيه

ممكن تسبب أنواع الحساسيه المختلفه فى متاعب كتير وهى منتشره على نطاق واسع للأسف وبتحصل الحساسيه لما بيخطئ الجسم فى تقييم مواد عادة بتكون غير ضاره زى العفن أو شعر الحيوانات الأليفه أو التراب أو حبوب اللقاح ، وبيعاملها باعتبارها جراثيم تغزو الجسم ويهاجمها ووقت الهجوم بيفرز الجسم بعض المواد الكيميائيه واطلاقها والمواد دى اسمها هيستامينات.

وبتسبب الهيستامينات دى أعراض الحساسيه المعروفه : تورم تجويف الأنف ، سيلان الأنف ، السعال ، العطس ، العين الدامعه .
وممكن ناس تتصاب بالام وضغط الجيوب الانفيه بسبب نوبات من الحساسيه وبتعرفك على الاسباب اللى ممكن تسبب حدوث نوبات الحساسيه ومشاكل الجيوب الأنفيه فده هيساعدك على تجنبها .

ايه هيا المواد اللى ممكن تسبب فى حدوث ردود أفعال تحسسيه ؟

ممكن تتنوع مثيرات الحساسيه تنوع كبير بين مختلف الاشخاص ومع ذلك فمن أكتر المواد شيوعا فى الموضوع ده :
حبوب لقاح الأشجار والأعشاب والحشائش البرية.
عثة الغبار ( حشرة مجهرية بتعيش في الغبار اللي ممكن يتراكم في العرايس القماش أو السجاد أو الفُرُش وهكذا)
العفن
لدغ الحشرات
الصراصير
اللاتكس
بعض الأطعمة زى اللبن والقمح والأسماك القشرية والفراولة والفول السوداني والمكسرات والبيض والليمون أو الفواكه الحمضية وهكذا.
بعض العقاقير زى البنسلين والأسبرين وهكذا.
الشموع
العطور
الصابون والمنظفات
مستحضرات التجميل

ايه اللى هتعمله عشان الحساسيه :

تعرف على مثيرات الحساسيه عندك واتجنبها على قد ماتقدر فده من غير شك أفضل علاج فعلى سبيل المثال :
لو كنت تعرف ان عندك حساسيه ناحية حبوب اللقاح فحاول انك تكون فى الاماكن المغلقه وقت موسم التلقيح على اد ماتقدر ، وخصوصا فى الايام اللى بيكتر فيها هبوب الرياح .
بدل فرش كل الارضيات بالسجاد وممكن استخدام بعض السجاد الصغير فى بعض الاماكن عشان يكون سهل تكرار غسلها .
اغسل العرايس القماش بالميه السخنه او غلفها فى اكياس بلاستيك وحطها فى الفريزر لساعات لقتل عثة الغبار .
استخدم انواع صابون ومستحضرات تجميل عديمة الرائحه لو كان عندك حساسيه من بعض العطور .
عليك مراجعة المعلومات الوارده على المنتجات الغذائيه بعنايه وتتأكد من خلوها من المكونات اللى ممكن تسبب المتاعب .
وكمان لازم تبعد الشموع والقطط طبعا .

ومع ذلك فاكيد مش هتقدر دايما تتجنب مثيرات حساسية الجيوب الانفيه عشان كده لو اتعرضت لنوبة حساسية سواء كانت مصحوبه بألم فى الجيوب الانفيه أو لأ هيكون كفايه استخدام الادويه المضاده للهيستامينات ومخففات الألم وممكن الصيدلى يساعدك فى التعرف على المنتج المناسب ليك ولازم تزور الطبيب لو كنت بتعانى من اعراض شديده او مش قادر تمارس الانشطه اللى بتحبها .

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

دليلك الكامل لاحمرار العين

دليلك الكامل لاحمرار العين لماذا تصاب في بعض الأحيان باحمرار العين وهل هناك علاجات بسيطة …