4 اسباب علميه تجعل النوم سر جمالك
1. الوجه والجاذبيه :
قلة النوم ممكن يخلى الانسان يظهر اقل جاذبيه واللى بيأثر على حياته الاجتماعيه ، تم التقاط صور لـ 25 مشارك مره واحده بعد ليلتين متتاليتين من النوم الكافى وتم تكرار عملية التصوير بعد ليليتن متتاليتين من النوم اللى اقتصر على 4 ساعات بس .
وفى مشاركين تانيين اتطلب منهم الحكم على مجموعتين الصور وادوا تصنيف منخفض لمستويات جاذبية اصحاب الصور اللى كانوا محرومين من النوم ، وده بالمقارنه مع المشاركين اصحاب الصور اللى ناموا نوم كافى .
2. هالات سوده تحت العينين :
معروف ان الهالات السوده تحت العينين بتكون بسبب قلة النوم ولكن ده مش كل اللى بيشوفه عيون الناس المحرومين من النوم .
وده لان فى دراسه تانيه تم تصوير 10 مشاركين مره واحده بعد 8 ساعات من النوم وتم تصويرهم مره تانيه بعد مافضلوا صاحيين لمدة 31 ساعه .
واتطلب من الناس الحكم وتقييم مظهر وجوه اصحاب الصور فكان الحكم ان وجوه اصحاب الصور المحرومين من النوم كانت باينه مرهقه وجفونهم معلقه واكتر احمرار وتورم بالاضافه كمان للهالات السوده .
3. التأثير على البشره :
وفى نفس الدراسه الاشخاص اللى اتطلب منهم الحكم على تصنيف صور المشاركين الـ 10 أكدوا برؤية الجلد الرخو وكمان عدد متزايد من التجاعيد او الخطوط الدقيقه فى وجوه المحرومين من النوم .
نوعية النوم بتأثر على وظيفة الجلد وشيخوخته ، وظهر على 60 امرأه من اللى اتعرضوا لنوم ردئ المستوى علامات شيخوخه مبكره للجلد وكمان ظهر الاجهاد واضح على الجلد .
4. مظاهر الحزن على الوجه :
تم الحكم على الوجوه المحرومه من النوم على انها بتظهر انحدار فى زوايا الفم وكمان التغييرات الواضحه فى العينين والجلد .
ولاحظوا كمان ان الحرمان من النوم بيخلى الوجوه تظهر اكتر حزن من الوجوه اللى بتنام نوم كافى واللى كان ليها صله بعلامات الارهاق والتعب .
وبما ان النوم والمزاج مرتبطين ارتباط وثيق فممكن ان الحرمان من النوم يساهم فى توليد مشاعر سلبيه قويه تظهر بوضوع على الوجوه .
وبناء على اللى اتقدم واضح ان الارتباط بين النوم والجمال يعتبر ظاهره حقيقيه مدعمه بالدراسات العلميه ولازم تتاخد على محمل الجلد .
وبعد كل حاجه التزين وقطرات العيون واى ابتسامه وهميه على الوجه مش ممكن انها تخفى اثار الحرمان من النوم .
