4 انواع للصداع وطرق علاجها

مهم انك تعرف نوع الصداع اللى بيصيبك عشان تقدر تتعامل معاه بطريقه صح فعلشان تعالجه كويس لازم يكون عندك وصف دقيق ، وفى اماكن مختلفه بتحس فيها بالألم وقت الصداع ، كل منطقه من مناطق الألم هي مؤشر على الاصابه بنوع مختلف والانواع دى هنعرضها مع بعض فى المقاله دى .

1. صداع التوتر :
مكان الألم : بيبدأ من ورا الراس ويمتد حوليها ويشمل الرقبه والكتف والفك وممكن ان الالم يستمر من ساعات لأيام لحد القضاء على سببه الرئيسي وهو التوتر .
النوع ده من الصداع مش بيكون شديد زى الصداع النصفى مثلا ومش بيسبب الغثيان او القئ وممكن تقوم معاه بالانشطه اليوميه من غير توقف ، وعلاج صداع التوتر مسكنات بسيطه زى : الإيبوبروفين والأسبرين لحد ما تنتهي الأسباب المؤدية إليه.

2. الصداع النصفى :
مكان الألم : بيصيب الانسان فى جانب واحد من الراس ألم حاد مصحوب بالدوار والقئ احيانا وبيخليك حساس للضوء والأصوات .
بيستمر الصداع النصفى بين 4 _ 72 ساعه واكيد هتتعرض لاتنين على الاقل من الالام دى : ألم فى جانب واحد من الراس ، وألم بسبب نبضات قويه ومتتاليه ، الام متداخله مع بعضها فى اكتر من مكان فى الراس ، ألم شديد يوقفك خالص عن ممارسة الانشطه الروتينيه ، واخيرا بيعانى حوالى 20% من مرضى الصداع النصفى من تنميل فى الايدين وعدم وضوح فى الرؤيه .
لو كانت نوبة الصداع النصفى خفيفه ممكن تاخد اى نوع من المسكنات دى : الباراسيتامول والإيبوبروفين والأسبرين، أما لو كانت النوبة قوية، فيفضل استشارة الطبيب المختص.

3. الصداع العنقودى :
مكان الألم : صداع مفاجئ وألم شديد بيظهر فجأه وبيصيب جانب واحد من الراس مصحوب باحتقان أو سيلان فى الأنف مع تدميع مستمر فى العين .
الصداع العنقودى بيصيب الرجاله اكتر من الستات حسب الاحصائيات وهو نوع متكرر بيحصل فى دورات وبيصيب الشخص لأسابيع متتاليه ويختفى لشهور ويرجع تانى ويستمر لأسابيع وهكذا .
مفيش علاج للصداع العنقودى بس بيهدى بالمسكنات وكمان مفيش سبب واضح عضوي أو نفسى للأصابه بيه ، لكن بيرجح بعض المتخصصين انه وراثى فى بعض الحالات .
وممكن تخفف من أعراض الصداع العنقودى عن طريق استنشاق الأكسجين أو تناول الأرجوتامين أو الكورتيزونات، وممكن تستنشق الأكسجين لمدة 10 دقايق كاسعاف سريع بس طبعا لازم ترجع للطبيب المختص قبل ماتاخد اى دوا .

4. صداع الجيوب الأنفيه :
مكان الألم : مقدمة الراس والوجه والأنف والعينين والخدين وبيزيد الألم فى ساعات النهار على وجه التحديد .
بيجى صداع الجيوب الأنفيه من الالتهابات والعدوى اللى فى الجيوب الانفيه وبيسبب ألم بيجى عادة مع سخونيه وبيشخصه الأطباء كعرض من أعراض دور الانفلونزا أو البرد .
ممكن علاج الصداع ده بمضادات الاحتقان والهيستامين والمضادات الحيوية.

ودى طرق لتخفيف الصداع من غير مانستخدم المسكنات :
1. روتين نوم ثابت وعدد ساعات كافيه حوالى من 7 _8 ساعات متواصله بليل .
2. تناول من 2_ 3 لتر ميه على مدار اليوم .
3. ممارسة أى نوع من الرياضه لمدة نص ساعه يوميا على الأقل .
4. تقليل تناول الملح فى الأكل والمنتجات التانيه .
5. حمام دافى ممكن يكون مسكن طبيعى لتخفيف الام الصداع .
6. استخدام مكعبات الثلج على مكان الألم بيخفف من حدته .
7. الاسترخاء فى مكان هادى ومن غير دوشه مع اضاءه خفيفه .

لو حسيت بألم مش محتمل بسبب أى نوع من الصداع يبقى لازم تستشير الطبيب فورا لوصف العلاج المناسب وابعد عن تناول المسكنات بكميات كبيره لان ليها اثار جانبيه على المدى البعيد منها الصداع المزمن !

#دكتور_مفيد
#روشتة_دوت_كوم
#الدواء_بقى_أونلاين