5 طرق لاستخدام بيكربونات الصودا

طبعا بتدورى دايما عن افضل الطرق عشان تكون بشرتك ناعمه وصافيه زى بشرة الاطفال ، بس متعرفيش ان تحقيق الحلم ده ممكن .. فعلا تقدرى تستخدمى حاجه من مكونات مطبخك وهي بيكربونات الصودا ، انتى اكيد تعرفى كتير عن استعمالاتها بس ممكن تكونى متعرفيش ازاى تستخدميها بطرق مختلقه عشان تحققى اهداف جماليه مختلفه واللى هعرفك عليها حالا …

1 _ تنضيف وشك :
عشان تنضفى وشك بأحسن طريقه حضرى الوصفه دى … قلبى معلقتين بيكربونات الصودا مع معلقه ميه دافيه لحد مايكون الخليط متماسك ومفهوش تكتلات .. اغسلى وشك بالميه كويس وبعدين افركيه بالخلطه دى بحركات دائريه وبعدين اغسليه تانى بالميه الفاتره وهتلاحظى ان بشرتك بقت نقيه جدا .

2_ تقشير بشرتك :
بيكربونات الصودا بتتميز بانها خشنه واللى بيخليها مقشر فعال لبشرتك واعملى الوصفه دى …. حطى معلقة بيكربونات لكريم تنظيف الوجه اللى بتستخدميه دايما وافركى بشرتك بالخلطه دى والنتيجه ؟ .. بشره ناعمه ومفيهاش اى شوائب .

3_ قناع الديتوكس :
تعرفى ان بيكربونات الصودا ممكن تساعد فى تخليص بشرتك من السموم ومن تأثيرات العوامل الخارجيه الضاره ، لو قلبتى معلقتين منها مع معلقة ميه فاتره وغطى وشك بالخلطه دى لحد ماتنشف خالص وبعدين اغسليه كويس ونشفيه براحه .

4_ قناع التفتيح :
عشان بشرتك تكون مشرقه ونضره وتجددى خلاياها اعملى الوصفه دى .. قلبى كويس شويه من عصير اللمون مع معلقتين بيكوبونات وشوية ميه دافيه لحد ماتكون عجينه متماسكه وبعدين غطى بيها وشك وسبيها تنشف وبعدين اغسليها بالميه الفاتره ونشفى بشرتك وهتلاحظى انها بقت صحيه وبتلمع ومفيهاش اى بقع غامقه .

5_ لازالة الرؤوس السودا :
عشان تحققى الهدف ده اهتمى انك تطبقى الوصفه دى بدقه … قلبى كميتين مناسبين من الميه وبيكربونات الصودا لحد ماتكون الخلطه منسجمه ودلكى بيها بشرتك براحه وركزى على المناطق اللى بتظهر عليها الرؤوس السودا وسيبى الخلطه على وشك دقيقه واحده وبعدين اغسليها وهتلاحظى انها بقت نقيه اكتر من اللى كانت عليه قبل كده .

#دكتور_مفيد
#روشتة_دوت_كوم
#الدواء_بقى_أونلاين