5 طرق لتقديم الحليب لطفلك
5 طرق لتقديم الحليب لطفلك
شرب كوباية لبن على الفطار لطفلك ، ممكن يكون مشهد خيالى جدا .. ومش بيحصل غير فى اعلانات منتجات الالبان ، وبناخد وقت فى اقناع الطفل بشرب اللبن السخن الصبح ممكن يوصل ليوم بحاله ومش هيخلص الكوبايه برضه … المهمه المستحيله لكل أم ، ولكنها بعد ماتقرأ الكلام اللى جاى دلوقتى مش هتكون مستحيله أو مرهقه.
بينصح خبراء تغذية الاطفال بتناول منتجات الالبان واللبن كل يوم علشان يحصلوا على نسبه كفايه من الكالسيوم والفيتامينات الازمه لنمو عظام الطفل وتطوره بصحه جيده ، ومع ذلك تقدرى تقدمى اللبن لطفلك فى اشكال كتير غير صورته الاصليه ككوباية لبن ناصعة البياض ، ويتقبله بسهوله .
ودى 5 طرق فعاله ومتجربه علشان يشرب ابنك اللبن من غير مايلاحظ الصبح وبليل كمان :
1_ قدمى لطفلك على الفطار طبق المهلبيه بالفواكهه أو الرز بلبن أو الكورن فليكس باللبن ، وبالطريقه دى هيتقبل طفلك تناول الفطار الغنى بالكالسيوم من غير مايرفض او يتضايق ، بالعكس هيكون مستمتع جدا ومش هيلاحظ طعم اللبن الصافى فى الاكلات دى .
2_ اضافة الشوكولاته أو الفاكهه او الفانيلا للبن هتخلى طعمه مغرى ومحبب لطفلك من طعمه الساده .
3_ قدمى لطفلك وجبات شهيه باستخدام اللبن زى الكريم كراميل و الرز المعمر والكيك والبان كيك ، وهياخد نفس فوايد كوباية اللبن السخن .
4_ فى الصيف ، تقدرى تقدمى السموثى اللى بيحبه الاطفال وتستخدمى اللبن المتلج مع الفواكه أو الشوكولاته .
5_ قدمى كوباية لبن لطفلك على طريقة البليله أو السحلب بالمكسرات أو قطع البسكويت .
