6 عادات سيئة قبل النوم تسبب زيادة الوزن
6 عادات سيئة قبل النوم تسبب زيادة الوزن
بتحاول تنقص وزنك ؟؟
جنب اتباعك لنظام غذائى وممارسة التمارين الرياضيه فى كمان بعض العادات السيئه اللى لازم عليك التخلص منها فى روتينك اليومى والعادات دى هيا اللى بتأثر على مسيرتك فى التخلص من الوزن الزايد.
6 عادات سيئة قبل النوم تسبب زيادة الوزن:
1- الأكل قدام التليفزيون:
يعتبر الاكل بليل وانت بتتفرج على التليفزيون من اكتر العادات السيئه اللى بيتبعها بعض الناس ، والاكل قدام التليفزيون بيحسسك بالجوع ويخليك تاكل كميات اكبر من العادى ، وانت بتتفرج على المسلسل او ماتش كوره فانت بتشوفه بكامل تركيزك وبعد مايخلص بتلاقى نفسك خلصت الاكل كله من غير ماتحس بالشبع فبتاكل اكتر وبالتالى بيزيد وزنك ، عشان كده اهتم انك تاكل وجباتك بعيد عن التليفزيون.
2_ النوم بعد وجبة العشا على طول :
لازم تكون وجبة العشا قبل ساعتين من النوم لأن الاكل وبعديها نوم على طول بيسبب مشاكل فى الجهاز الهضمى وبيأثر على عملية الايض وبيساعد على تحويل السعرات الحراريه لدهون فى الجسم.
3_ تناول المقليات فى وجبة العشا:
تعتبر المقليات سبب من الاسباب الاساسيه اللى بتسبب زيادة الوزن وخصوصا لو كلتها بليل لانها بتحتوى على نسبه عاليه من السعرات الحراريه اللى مبيقدرش الجسم على حرقها اثناء النوم فبيخزنها فى الجسم على هيئة دهون وتقدر تستبدل المقليات بالمشويات او المخبوزات.
4_ السهر لوقت متأخر من الليل :
بيسبب السهر بليل زيادة الوزن فالجسم بيحتاج لـ 8ساعات من النوم المتواصل واللى بينام 5 ساعات بليل او اقل بيكون اكتر عرضه لزيادة الوزن بنسبة 30% لأن السهر بيساعد على زيادة هرمون الكورتيزول المسؤول عن الشعور بالتوتر وبيسبب زيادة الهرمون ده لبطء عملية التمثيل الغذائى وبالتالى بيزيد وزنك بسرعه كبيره عشان كده يبقا لازم تاخد كفايتك من النوم كل يوم.
5_ تصفح وسايل التكنولوجيا قبل النوم :
اثبتت الدراسات ان التعرض للضوء الازرق اللى خارج من اجهزة الموبايل او الكمبيوتر بيسبب الاحساس بالأرق وقلة النوم وبالتالى بيأثر على الصحه علشان كده اهتم بعدم التصفح قبل ساعه من النوم وممكن تستبدلهم بقراية كتاب او تسمع موسيقى هاديه اللى تساعدك على الاسترخاء.
6_ تناول الحلويات قبل النوم :
تحتوى الحلويات زى الكيكه على الدقيق والسكر واللى بيخلى فيها نسبه عاليه من السعرات الحراريه اللى بتحتاج وقت طويل لحرقها وتناولك للحلويات بليل بيزود وزنك بسرعه كبيره وتقدر تستبدلها بالفاكهه الطازه.
