8 اشياء عليكى تجنبها لحدوث الحمل
8 اشياء عليكى تجنبها لحدوث الحمل
وفى المقاله دى هقدملك 8 حاجات ممنوعه لو عايزه يحصل حمل :
التدخين :
التدخين احد اسباب تاخر الحمل وبتاكد الجمعيه الامريكيه للطب التناسلى ان الستات المدخنات عرضه انهم يخلفوا اطفال مشوهين ، عشان كده لو كنتى مدخنه وعايزه تخلفى يبقى لازم تتوقفى فورا عن التدخين ومش انتى وبس وكمان جوزك لازم يوقف التدخين لأن نسبه كبيره من المدخنين بيعانوا من قلة الحيوانات المنويه .
الكافيين :
لو كنتى من محبى القهوه والشاى والمشروبات اللى فيها نسبه عاليه من الكافيين يبقى لازم تقللى منها والكميه المسموح بيها يوميا هيا كوبايه او كوبيتين كحد اقصى .
وبتأكد الابحاث ان كتر الكافيين بيضر بصحة الستات اللى عايزين يخلفوا لانه بيقلل من فرص امتصاص الحديد فى الجسم وبكده بيزود من خطر الاجهاض وخطر الولاده المبكره .
زيادة الوزن او نقصانه :
زيادة الوزن او نقصانه بشكل مش طبيعى بيسبب عدم انتظام الاباضه عند الستات .
وقلة الوزن اللى مش طبيعيى ممكن يسبب توقف الاباضه تماما ، اما زيادة الوزن بيعرض الست للاصابة بسكر الحمل او تسمم الحمل وحدوث تشوهات كمان .
عدم تناول الخضروات :
من الحاجات اللى لازم الاهتمام بيها تناول الخضار وممكن يقولك الدكتور بأن ممنوع تمر وجبه من غير مايكون فيها خضار زى الجرجير اللى بيحتوى على حمض الفوليك المهم جدا للستات الى عايزين يخلفوا .
اهمال الاسنان :
من الممنوعات ، اللى لازم الابتعاد عنها فى وقت محاولة الحمل هيا اهمال السنان لان سوء صحة الفم بيأثر على الحمل وعند الراجل بيأثر على الحيوانات المنويه وعند الستات بيسبب الولاده المبكره وولادة اطفال بوزن منخفض .
عشان كده لو كنتى بتخططى للانجاب يبقى عليكى انك تبدأى بالاهتمام بصحة سنانك ولثتك انتى وجوزك كمان .
عدم ممارسة الرياضه :
الكسل وعدم ممارسة انشطه رياضيه كمان بياثر بشكل كبير على سرعة حدوث حمل لكن طبعا عليكى ممارسة التمارين بشكل معتدل وعدم الافراط فى ممارسة تمارين مجهده .
استخدام الازايز البلاستيك :
ممكن تستغربى لو قولنالك ان من الممنوعات هو الشرب فى ازايز الميه البلاستيك ، واكدت الدراسات ان المواد الموجوده فى الازايز دى بتأثر على خصوبة الرجاله والستات .
وممكن تستبدليها باستخدام ازايز ميه من الزجاج .
الاسماك الكبيره :
السمك غنى ببروتين مهم جدا لصحة الانسان والحامل بالتأكيد لكن عليكى انك تبعدى خالص عن الاسماك الكبيره اللى بتحتوى على كميات كبيره من الزئبق .
عليكى الاهتمام بتناول السمك قليل الزئبق زى الانشوجه والمحار وسرطان البحر والبلطى .
