فوائد زيت الزيتون لجمالك
زيت الزيتون ياجماعه خطتشييير ومليان فيتامينات ومعادن تخليه من الزيوت اللى ليها فوايد لاتعد ولا تحصى ، مش للصحه وبس لأ ده كمان للبشره والجسم .
وتعاليلى دلوقتى علشان هقولك اهم فوايد زيت الزيتون التجميليه وفوايده للبشره والجسم والشعر .. وادعيلى :
ازالة مكياج العيون :
بيستخدم زيت الزيتون فى ازالة اثار المكياج من العين ، هتحطى شويه من زيت الزيتون على قطنه ومشيها على عينك .
ازالة الشعر :
تقدرى تبدلى كريم الحلاقه بزيت الزيتون ، زيت الزيتون روعه هيجنبك الندبات والجروح اللى ممكن تسببها الشفرات ليكى.
تنضيف الوش :
زيت الزيتون ممكن تستعمليه زى منظف للوش والبشره وكمان بيوحد لون البشره وبيفتحها وتقدرى تعملى اقنعه مختلفه بزيت الزيتون زى قناع زيت الزيتون والسكر البنى أو قناع زيت الزيتون وزيت اللوز.
ترطيب البشره :
بيحتوى زيت الزيتون على فيتامين هـ وحمض الأوليك اللى بيساعد على ترطيب الجلد وبيحافظ على ليونته ، دلكى جسمك بزيت الزيتون بعد الشاور .
تقشير الشفايف :
بيمنع زيت الزيتون تشقق الشفايف وبيرطبها وتقدرى تعملى مقشر طبيعى لشفايفك من زيت الزيتون بمعلقه صغيره من زيت الزيتون ومعلقه صغيره من الملح أو السكر وقلبيهم كويس مع بعض ودلكى شفايفك بيهم براحه وهتلاقى شفايفك ناعمه وورديه.
تأخير ظهور التجاعيد :
بيحتوى زيت الزيتون على مضادات أكسده مختلفه ليها دور أساسى فى الحفاظ على صحة البشره وتأخير ظهور التجاعيد وعلامات الشيخوخه.
محاربة علامات التمدد :
زيت الزيتون بيساعد على التخلص من علامات التمدد اللى بتظهر بعد الولاده أو فقدان الوزن ، دلكى أماكن العلامات دى بزيت الزيتون الدافى ومع الاستمرار هتختفى خالص العلامات دى ان شاء الله.
معالجة الشعر :
بيستخدم زيت الزيتون فى معالجة الشعر التالف والجاف ، دلكى شعرك بزيت الزيتون الدافى قبل الشاور وسيبيه على شعرك لمدة 20 دقيقه وبعدين اغسلى شعرك بالشامبو.
منع تساقط الشعر :
بيحتوى زيت الزيتون على فيتامين هـ اللى بيغذى الشعر وبيمنع تساقطه وكمان بيحتوى على فيتامينات كتير مغذيه محتاجها الشعر زى الزنك وفيتامين ب.
