تشجيع طفلك على صوم رمضان
تشجيع طفلك على صوم رمضان
لازم نعرف ازاى نتعامل صح مع الطفل الصغير عشان نعلمه الصيام فى شهر رمضان وندربه على كده ، لازم نحببه فى الصيام ونعلمه اهمية الصيام روحيا وبدنيا وصحيا ، ده غير تهذيب النفس وغيرها من الفوايد العظيمه للشهر الفضيل .
_ عشان نشجع الطفل على الصيام ضرورى منلجأش للعنف والصريخ واجباره على الصيام من غير ميكون عنده الرغبه فى الصيام عشان ميعتقدش ان الصيام تعذيب للنفس .
_ لازم نختار السن المناسب للصيام فمينفعش تطلب من طفل لسه متجاوزش الست سنين انه يصوم ، الست سنين يعتبر سن مناسب لتدريب الطفل على الصيام بشكل تدريجى .
_ لازم نستغل رغبة الطفل فى اثبات نفسه واقتناعه باللى بيعمله كل أهله وقرايبه ، ونشجعه على الصيام وفتح باب للحوار مع الطفل عن كيفية الصيام وايه هو شهر رمضان وليه بنصوم فى الشهر ده ، ونكون قدوه حسنه للطفل من تصرفاتنا وتوصيل المعلومات الصح على الصيام .
_ تشجيع الطفل عن طريق الكلمات الطيبه ونقدم المكافات ليه عشان نشجعه على صيام شهر رمضان ، فلو بدأ بصيام ساعه واحده فى أول النهار وكافأناه على ده هيحس بالرضا والسعاده وانه أنجز شئ ايجابى وهيكرر المحاوله مره تانيه .
_ مهم أوى نعلم الطفل اخلاقيات شهر رمضان وضروري نستثمر شهر رمضان لغرس بعض القيم والمبادئ الكويسه فى الطفل زى صلة الرحم والعطف على الفقراء والصبر والامانه ومساعدة المحتاج والصلاه فى جماعه والصدق والقدره على تحمل العطش والجوع عشان نرضى ربنا سبحانه وتعالى .
_ لازم نهتم كمان باننا ناخد الطفل للصلاه عموما وفى الشهر الفضيل خصوصا لان ده بينمى جواه روح الجماعه ويخليه يفهم ان الهدف الأول من الصيام والصلاه هو ارضاء الله عز وجل .
_ ومهم كمان نجاوب الطفل على كل الاسئله الكتيره اللى بتدور فى دماغه ولازم الاهل يجاوبوا عليها بشكل مقنع عشان الطفل يفهم من صغره ان الهدف من الصيام هو تطهير النفس من الذنوب والمعاصى ومش تعذيب من الله عز وجل .
