الصداع فى بداية رمضان
الصداع فى بداية رمضان
في بداية رمضان ممكن يكون معظم التغييرات الفيسيولوجيه بتسبب الصداع : منها الجوع والعطش ، الحراره وفقدان السوايل ، انسحاب الكافيين والنيكوتين ، انخفاض السكر وتغيير عادات النوم ، بس مع تتابع أيام الشهر الكريم بيتعود الجسم على الوضع الجديد ويكون الصوم كله فايده للروح والبدن .
درجات الحراره المرتفعه :
شهر رمضان الكريم جاى السنه دى فى الصيف ودرجات الحراره العاليه وأشعة الشمس الحارقه وطول ساعات الصوم وكمان غير فقدان كميه كبيره من السوايل والمعادن بسبب الحراره ، كل دى أسباب بتسبب الارهاق والصداع .
نقص السكر فى الدم :
يعتبر السكر مصدر رئيسى للطاقه فى الجسم ، نقص السكر وانخفاض مستواه عن المعدل الطبيعى بيسبب الصداع والارهاق الشديد ، لأن خلايا الدماغ محتاجه للسكر بشكل دايم والنقص المفاجئ فى كمية السكر فى الدماغ بيسبب الصداع اللى غالبا بيزيد فى الساعات الاخيره من النهار .
نقص السوايل :
من أسباب الصداع الشائعه ، نقص السوايل فى الجسم لاننا بنفقد كميه كبيره من الميه بسبب التعرق والتبول وبتختلف الكميه دى اعتمادا على الطقس والمجهود البدنى اللى بنعمله .
انسحاب مادة الكافيين :
انسحاب مادة الكافيين من الجسم بسبب الامتناع عن شرب القهوه والشاى والشوكولاته وغيرها من المشروبات والأكل اللى بيحتوى على مادة الكافيين اللى اتعودنا ناخدها فى النهار وده بيسبب الصداع .
اختلال فى النظام الغذائى :
ممكن يجى الصداع بسبب اختلال فى النظام الغذائى بسبب تغيير مواعيد الوجبات وتغيير الأكل اللى بناكله لان سفرة رمضان مختلفه عن سفرة كل يوم .
تغييرات فى نظام النوم :
التغييرات فى نظام النوم والصحيان فى رمضان وبتكتر السهرات وبتتغير مواعيد النوم وبالتالى بتقل ساعات النوم وده بيسبب الصداع .
الاجهاد :
الاجهاد فى الصيام بحد ذاته وكتر الشغل والتوتر ، كل الحاجات دى ممكن تسبب الصداع .
انسحاب النيكوتين من الجسم :
نقص كمية النيكوتين فى الدم بسبب التوقف عن التدخين بالنهار بسبب حدوث الصداع واللى ممكن يخف مع الوقت لما الجسم يتعود على الانسحاب .
