معلومات عن تفاحة آدم
معلومات عن تفاحة آدم
تفاحة آدم، أو زى مابيسميها بعض الناس جوزة الحلق ، وهي جزء بارز فى مقدمة الرقبه عند الرجاله واللى بيسبب انتفاخ الجزء ده غضروف الغده الدرقيه “الغضروف الدرقي” اللى يعتبر الأكبر بين غضاريف البلعوم التانيه .
وفى العاده بتظهر “تفاحة آدم” عند الرجاله فى سن البلوغ وبتكبر شويه بشويه ، لأن سماكة الأحبال الصوتيه للرجاله بـتضغط على الغضروف الدرقى وبالتالى يبرز فى مقدمة الرقبه بشكل كبير وملحوظ .
ليه الرجاله عندها الجزء المنتفخ فى الرقبه “تفاحة آدم” والستات لأ ؟
بيتولد الراجل والست بالحنجره لكن فى فترة مرحلة البلوغ بيزيد افراز هرمون التستوستيرون عند الراجل بشكل كبير وده بيساهم فى حدوث التغييرات على جسم الراجل ومنها خشونة الصوت وطبعا زيادة سماكة الأحبال الصوتيه .
وزى ماقولنا قبل كده بأن الزياده دى فى سماكة الأحبال الصوتيه بتسبب ضغط على الغضروف الدرقى وبروزه لبره .
وده مش معناه ان الستات مش بيمتلكوا الجزء البارز ده اطلاقا ! بس فى بعض الحالات عندها تفاحة آدم برضه ، وبيرجع ده لأسباب مختلفه متتعممش على كل الستات منها : ممكن تكون حاجه وراثيه ، أو خلل تشريحي فى تكوين الغضروف الدرقى ، وممكن ميكنش البروز دى تفاحة آدم انما يكون نمو غضروفى على الرقبه بسبب بعض الحالات الطبيه التانيه .
وطبعا وجود “تفاحة آدم” عند بعض الستات مش مرغوب فيه باعتبارها سمه رجوليه وبتقلل من أنوثة المرأه ، وكتير من الستات دول بيعملوا عمليه جراحيه تجميليه اسمها “chondrolaryngoplasty” ، وزيها زى اى عملية تجميل تانيه ليها بعض المخاطر اللى ممكن تأثر على الصوت !
ليه سُميت “تفاحة آدم” بالأسم ده ؟!
بالنسبه للتسميه اختلفت الاراء فى السبب الرئيسى لاختيار الاسم ده ومن الاراء دى :
_ البعض بيعتقد ان أسم تفاحة ارتبط بالجزء ده فى رقبة الرجاله لانه بيشبه لحد كبير شكل التفاحه ، أما ادم فلأنها سمه مميزه للرجاله اللى بيتنسبوا لنبي الله آدم عليه السلام.
_ ناس تانيه شايفين ان الأسم بيرجع للتفاحه اللى كانت سبب فى طرد سيدنا آدم وزوجته من الجنة بعد وسوسة الشيطان ليهم. والرأى ده قاله بعض اليهود المتدينين معتقدين ان التفاحه اتعلقت فى حلق سيدنا ادم لما كان بيحاول يبلعها واللى سبب لبروزها وعشان كده سموها بالأسم ده ! وده على حسب الروايه .
_ رأى تانى بيعتقد ان الأسم مشتق من أهمية الجزء ده للراجل فأى ضربه قويه على الجزء ده ممكن تكون مميته للراجل ، بالظبط زى ماكانت التفاحه اللى أكلها سيدنا ادم سبب فى خروجه من الجنه !
وعلى اختلاف الروايات ، نؤكد انها مش بتعكس رأى أو نظره للسبب ، انما اتجمعت لتوضيح التباين فى الآراء.
