طرق اتقان القراءه السريعه
![](https://blog.rosheta.com/wp-content/uploads/2017/06/19113788_1933205580225170_3146715860758416519_n.png)
طرق اتقان القراءه السريعه
تعتبر القراءه من أهم الحاجات فى حياتنا ولازم نتقنها لأن القراءه بتشكل نسبة من 80 : 90 من الثقافه اللى بيحصل عليها الأنسان وتقدم الأمم والشعوب مرهون بتقدمها الثقافى اللى بيعتمد على القراءه .
قلة أهتمام الشعوب العربيه بالقراءه زى ماقالت الدراسات اللى وضحت ان الطفل الأمريكى بيقرأ 13 كتاب فى السنه انما قراءة الطفل العربى مش بتتجاوز 15 صفحه فى السنه ، وكمان سرعة القراءه اللى معدلها فى الدول العربيه مابين 150 : 170 كلمه فى الدقيقه ، انما فى الدول الغربيه حوالى 250 كلمه فى الدقيقه ، أما الاستيعاب بتتساوى الدول العربيه مغ الغربيه وبتتراوح مابين 45 : 50 %.
وفى الزمن ده أصبحت القراءه السريعه ضروره لملاحقة ثورة المعلومات فى عصرنا الحالى .
فوائد القراءه السريعه :
1. تحصيل أكبر قدر من العلم فى وقت أقصر وكمان مع التنوع فى الاطلاع على المقروءات وهتلاقى انجاز كبير بسبب السرعه فى القراءه .
2. الاستفاده من القراءه السريعه وقت الحاجه وسرعة الحصول على المعلومه .
3. لما بتحاول السرعه فى القراءه بتخلى تركيزك أكتر ومع التعود على ده هيكون فهمك وتركيزك عالى .
4. حب القراءه : لما هتلاقى نفسك بتاكل الصفحات قراءه هتحس بالمتعه واللى هتخليك تحب القراءه أكتر وتكتر منها .
طرق التسريع :
1. كتر من القراءه مع محاولة السرعه فى القراءه مع الحرص على الفهم العام للنص .
2. خلى بدايتك فى الكتب السهله وبعد كده تدرج فى الصعوبه .
3. متقراش الكلمات بظهور صوت أو حتى بتحريك الشفايف وبس اقرأ بعينك .
4. اقرأ الكلمات كصور تتخيل معناها وشكلها ، بيقول أحد المؤلفين ( عندما تجتمع القراءه والتصور تصبح السرعه والادراك أعلى ) .
5. وسع مدار عينيك فى قراءة كذا كلمه فى السطر وخلى حركة عينيك سريعه بين الكلمات .
6. اتنقل من سطر لسطر ومن صفحه للتانيه بسرعه وده لسرعة الارتباط واختصار الوقت .
7. متقراش اللى فى الهوامش فى حالة تدريبك على السرعه بس .
8. مترجعش لماسبق حتى لو مفهمتهوش والكاتب بيعيده لأهميته أو انه ملوش فايده مهمه لأنه رابط بين الكلام أو كلام زياده ، ولو كان غير كده يبقى مفيش مشكله لأنك فى تمرين تسريع قراءتك .
9. فى بدايتك للقراءه السريعه هتعانى من قلة الفهم فمتقلقش ناحية عدم الفهم لأنه شعور مؤقت هيروح مع تدريبك وتعودك على الاسلوب ده ان شاء الله .
10 . احيانا بيرد عليك موضوع عارفه أو قصه عارفها فى الحاله دى ممكن تتجاهل قراءتها اختصار للوقت .
11. عند تدريبك للقراءه السريعه اقرأ فى المقالات اللى اتكتبت على شكل أعمده زى اللى فى الجرايد لأن سرعة انتقالك بين السطور القصيره والأعمده الصغيره هيساعدك على القراءه السريعه للنص .
سرعة قراءتك :
المعدل الطبيعى لسرعة القراءه ومكتوبه بلغته الأصليه بيكون بين 200 لـ 300 كلمه فى الدقيقه ، طيب ازاى تقيس سرعة قراءتك ؟
_ هات كتاب عايز تقراه ومنبه بحيث تخليه يرن بعد وقت محدد من بدايتك للقراءه .
_ ابدأ بالقراءه وطبق ماسبق قولناه فى طرق تسريع القراءه .
_ بعد كده اتوقف بعد الزمن اللى حددته .
_ استخدم العلاقه دى : عدد الكلمات فى الدقيقه = عدد الكلمات في السطر×عدد الأسطر في الصفحة×عدد الصفحات .
_ الوقت اللى خدته فى القراءه والحساب ده تقديرى لأن طول السطور وحجم الورق بتختلف من كتاب لكتاب تانى .
مواقع للتدريب على القراءة السريعة بالانجليزى
https://www.spreeder.com/
http://www.mindbluff.com/askread.htm