نصايح لفقدان الوزن خلال رمضان
نصايح لفقدان الوزن خلال رمضان
1. منتخلاش عن طريقة الطهى الصحيه فى رمضان لانه مش بيختلف عن غيره من الشهور من ناحية الأكل عشان كده عليك الابتعاد عن الاطباق المقليه وبدلها بالمشويه والمسلوقه .
2. لما تسمع اذان المغرب بلاش تفطر على ميه متلجه وبدلها بميه عاديه أو كوباية لبن مع 3 تمرات ومتبدأش بالأكل على طول عشان تدى فرصه للمعده تستقبل الأكل بشكل كويس ومتعانيش بعد كده من عسر الهضم .
3. ابدأ أكلك بطبق السلطه المليان بالخضار الطازه والألوان المختلفه ومتنساش الخضار الورقى عشان ليه فوايد ومليان فيتامينات ولاغنى عنها بعد فترات الصيام الطويله .
4. الشوربه واحده من الاساليب الكويسه لسد شهيتك عن الأكل اللى مش مفيد لكن أبعد عن اضافة المواد المليانه بالدهون للشوربه زى الكريمه واللبن الكامل الدسم .
5. قسم طبقك دايما لتلات أقسام : نص الطبق للسلطه أو الخضار المستوى ، والنص التانى ينقسم على ربعين هما البروتين سواء نباتى أو حيوانى، والنشويات ويكون أحسن تكون خفيفه على أد ماتقدر .
6. مينفعش ابدا أكل الحلويات بعد الفطار على طول عشان نقدر نهضم الأكل بشكل كويس على الأقل يكون الفاصل بينهم 3 ساعات .
7. لو عايز بجد تحقق فقدان الوزن يبقى عليك تبعد عن الحلويات المليانه بالسكر والدهون وتبدلها بالفاكهه اللذيذه واللى موجوده فى فصل الصيف زى البطيخ والتفاح والمشمش والخوخ ، كل منها مقدار بسيط بين وجبة الفطار والسحور .
8. شرب الميه هي النصيحه الأهم فى رمضان ، خصوصا انه بيجى فى فصل الصيف وبيفقد الجسم كتير من الميه فى فترة الصيام عشان كده عليك بشرب كوباية ميه كل 45 دقيقه وممكن تستخدم بعض تطبيقات الموبايل عشان تفكرك .
9. ابعد كمان عن العصاير المليانه بالسكر وبدلها بالعصاير الطبيعيه ويكون أحسن تاكل الفاكهه زى ماهيا عشان تحصل على الفايده بشكل كامل .
10 . بينصح بعض أخصائى التغذيه بتجهيز لتر من الميه منقوع فيها شرايح الجنزبيل الطازه قبل الفطار بـ 4 ساعات وتشرب كوباية منه كل شويه لانه ليه فوايد عظيمه فى تنقية الجسم .
11. لازم السحور يكون فيه بروتين زى الفول والزبادى والجبنه القريش والحبوب الكامله زى العيش بالحبوب الكامله أو الشوفان ، وكمان وجود واحدة فاكهه زى التفاح أو الموز أو شرايح البطيخ فى السحور ده بيساعد على الاحساس بالشبع طول ساعات الصيام .
12. أخيرا .. متهملش الرياضه فى شهر رمضان وتقدر تمارس الرياضه الخفيفه زى الكارديو أو المشى قبل الفطار بساعه أو بعد الفطار بـ 3 ساعات أو أربعه .
لو ألتزمت بكل النصايح دى هتلاقى تغيير فى صحتك ووزنك بكل تأكيد .
