التخدير النصفي بين الواقع والأسطورة
التخدير النصفي بين الواقع والأسطورة
الأسطورة (مع احترامنا لدقن الأستاذ محمد رمضان) :
البنج النصفي هو حقنة طويلة أووووي ,وبتوجع أووووووي بتتاخد في الضهر ,بيديهالك دكتور مايعرفش ربنا عشان يروّح بيتهم ينام ويسيبك انت مرعوب وحاسس وبتصرخ وانت شايف الجراح بيقطّع في لحمك ..ناهيك عن ان الحقنة نفسها بتشلّ وبتموّت وبتعمل زغللة في العين واحتباس في البول وعجز جنسي…. ويمكن تفقد الذاكرة
.. فلو أي دكتور عرض عليك يديلك بنج نصفي اعمل الآتي :
1- ارفض بعنف وحسم وغباء وماتخليهوش يخدعك بكلامه الرقيق ووعوده المعسولة.. ماتبعش روحك للشيطان
2- قولّه انك عامل عملية في ضهرك ..هيخاف ويتقي الله ويمكن يشهر اسلامه
3- تاخد اسم الدكتور وعنوان المستشفى وملفك الطبي وتطلع فورا على الأستاذ وائل الابراشي وهو هيقوم باللازم
…………….
اطفي بقى التلفزيون ,واقفل صفحة (انا حلوة وزي الفل)… واسمع الكلمتين دول ….
– البنج النصفي مابيعملش شلل لأنه أصلا بيتحقن بعيد عن الحبل الشوكي .. لأن الحبل الشوكي بينتهي عند الفقرة القطنية الأولى ..الحقن بيحصل غالبا بين الفقرتين الرابعة والخامسة
– سمي التخدير النصفي بالنصفي لأنه بيخدر نصف الجسم السفلي فقط ..مش عشان مفعوله بيخلص في (نص) العملية ولا حاجة .. والبديهي انه لايصلح لعمليات الأنف والأذن والغدة الدرقية وأورام المخ
– التخدير النصفي هيخليك محتفظ بدرجة وعيك أثناء العملية ..دة مش معناه انك حاسس أو شايف .. لأنهم بيحطوا ستارة بينك وبين الحقل الجراحي .. انت صاحي بس مالكش أي علاقة بنصك التحتاني مؤقتا (ولامؤاخذة)
– مقارنة بالتخدير الكلي ,فالتخدير النصفي تأثيره أقل نسبيا على القلب والصدر والكلى والكبد .. عشان كدة هو أنسب للمدخنين ومرضى الحساسية الصدرية
– التخدير النصفي هو الاختيار الأول في أمريكا والدول المتقدمة لحالات الولادة القيصرية , وهو الاختيار الأمثل لك عزيزتي الحامل لأن التخدير الكلي له تأثير نسبي على الجنين وعليكي , الاتنين آمنين ان شاء الله ..بس فيه الآمن وفيه الأكثر أمانا ..والأولوية عند (بتوع برة) بتبقى للأمان ..يمكن بعكس الأولوية عندنا اللي بتبقى ل “مش عايزة أدرى بحاجة” و “أنا متعودة على الكلي ..” و “خالتي قالتلي بلاش نصفي” .. مع احترامنا لخالتك , ولمحمد رمضان
*ايه اكتر حاجة ممكن تضايق في التخدير النصفي؟ :
1- الصداع ..ممكن يحصل وممكن لأ ,وأحيانا بيبقى مزعج وبيستمر لأيام بعد العملية .
سببه : يحقن الدواء في سائل النخاع الشوكي بعد أن تخترق ابرة التخدير طبقة الجلد .. تترك الابرة (خرما) في هذه الطبقة فيتسرب سائل النخاع الشوكي ببطء من هذا (الخرم) ويظل هذا التسريب حتى يحدث الالتئام بعد فترة ..المخ عائم في هذا السائل (عذرا في التشبيه) كبالونة المرحاض ..عندما ينخفض منسوب السائل تتحرك البالونة للأسفل مسافة بسيطة للغاية لكنها بشكل معين ونتيجة الشد على أجزاء معينة داخل الجمجمة تؤدي للصداع
علاجه : يقع أغلبه على عاتق طبيب التخدير .. انت كمريض مش مطلوب منك غير انك ماترفعش راسك وتخليك نايم بشكل أفقي لمدة ست ساعات بعد العملية (دة مش بيمنع الصداع أد مابيقلل درجته) .. واذا حصل الصداع بنبدأ بالمسكنات العادية ..نشرب سوائل كتير وبالذات الشاي والقهوة (عشان مادة الكافيين) ..حزام بطن ونوم بدون مخدة
2- الدوخة والميل للقيئ …بتحصل أحيانا وبتبقى نتيجة انخفاض ضغط الدم ودة طبيعي بعد التخدير النصفي ..وبيعالجها دكتور التخدير في ساعتها
3- ضيق النفس .. ودة وارد أثناء الولادات القيصرية خصوصا بعد خروج الجنين ..كل الدم اللي في المشيمة بيرجع للدورة الدموية للأم ودة حمل نسبي على القلب بالاضافة الى شد دكاترة النسا على الغشاء البريتوني لحضرتك ودة أحيانا ممكن يعمل احساس بعدم الراحة ..احساس ممكن تستحمليه مالم تكوني من عينة (فااار يامسعودييييي)
4- الرعشة … عادي انها تحصل لأن جسمك بعد التخدير النصفي بيفقد حرارة ..بعيدا عن ان البنج له هيبة
5- الزهق … خصوصا لما تكون بتبص في السقف مستني العملية تخلص .. فيه ناس بتزهق بسرعة وفيه ناس بيحسوا بفراغ وبيدوّروا على طريقة يحققوا بيها ذاتهم فبيبحثوا عن أي شكوى .. ودي بنعالجها بأننا ندي مهدئات خفيفة وبنحاول نكون مسليين .. والستات ممكن تاخد موبايل جوزها وباسوورد الفيس معاها أثناء العملية ..وفيه منهم حالات مسجلة مااحتاجتش تتخدر أصلا
*ايه أكتر حاجة حلوة في التخدير النصفي ؟:
– أمان نسبي مقارنة بالتخدير الكلي
– هتاكل وتشرب بعد العملية بوقت قليل
– الألم بعد العملية بيكون أقل مقارنة بالتخدير الكلي وبالتالي بتحتاج جرعة أقل من المسكنات
– بتخرج من المستشفى وبترجع لحياتك الطبيعية أسرع
– كونك واعي أثناء فترة العملية مش مرعب زي مانت متخيل ..ممكن تتكلم مع الجراح وهو بيصلح لك الفتق وممكن تكوّن صداقات جديدة وممكن تسمع النكت اللي بتتقال في أوضة العمليات .. وعندنا عروض تانية كتير
– وعيك -عزيزتي الحامل- أثناء الولادة القيصرية بيخليكي تتواصلي أسرع مع البيبي دة غير المتعة اللي بتحسيها لما تسمعي صريخ الكائن الصغير دة وهو بيخرج من بطنك..كل دة بدون أي ألم ..ومحدش هيصدق أصلا انك كنتي بتولدي (إلا لو كانت الخطة انك تصعبي على حماتك .. ودي ساعتها ممكن تتظبط مع دكتور التخدير وفريق الاعداد)
*ايه اللي لازم أعرفه قبل ماأقرر؟ :
– مفيش اكراه في البنج
– انت حر تختار نوع التخدير والعلاج بتاعك بعد ماتتناقش مع الدكتور وتتأكد انه عايز مصلحتك
– مفيش حاجة مطلقة في الطب أو الكون
– وجود مشاكل أو مضاعفات او أخطاء طبية مابينفيش القاعدة مادام متطبقة صح وعلى أسس علمية و حاجات تانية بتوع برة بيسموها Guidelines
– صوابعك مش زي بعضها ..والموضوع اختيار.. ناس بتقبله وناس بترفضه .. لكن ماينفعش يبقى حكم عام ..فحكاية (المريض يبقى صاحي ازاي في العملية ياسفاحين) ..مش هرد عليها لأن فيه ناس لاهم دكاترة ولا احنا اللي مأجرينهم بينادوا بالبنج النصفي الوسطي الجميل
– مفيش حرية اختيار من غير علم .. اعرف..أفهم.. وبعدين قرر… وسيبك بقى من الرأي العام والكتلة الحرجة ودقن محمد رمضان .. انت شخص بالغ عاقل وبتفهم .. وثقة في الله هتختار صح
……
في النهاية نتمنى لكم كامل الصحة والعافية ..وربنا مايحوجكم لعمليات ..ولا يكتب لكم بنج نصفي أو كلي ..لأن دكاترة التخدير فعلا عايزين يناموا 
?
دمتم بلا ألم 
?
