6 أطعمه تزيد من الام الدوره الشهريه تجنبيها
بمجرد اننا نحس ان ميعاد الدوره الشهريه قرب بتبدأ فترة التوتر والقلق والتشنجات المصاحبه ليها ، ولأن الاكل اللى بناكله بيأثر على احساسنا بالوجع ، هقدملك مجموعه من الاكلات اللى لازم تبعدى عنها فى فترة الدوره الشهريه لأنها بتساهم بشكل مباشر فى زيادة تقلصات البطن :
1. الكافيين :
بيتسبب الكافيين فى زيادة الوجع فى فترة الدورة الشهريه لانه بيساهم فى تضييق الاوعيه الدمويه وكمان بيرفع من نسبة التوتر علشان كده حاولى تقللى كمية الشاى والقهوه والشكولاته المحلاه فى الفتره دى ولو حسيتى انك عايزه تاكلى شكولاته فاختارى الشكولاته الغامقه واللى مش محلاه صناعيا.
2. الملح :
بيحسوا ستات كتير بالتضخم والانتفاخ فى فترة الدورة الشهريه ، والملح بيساعد على زيادة احساسك بالوجع فى الفتره دى واستبدلى الملح بالتوايل والاعشاب اللى تدى الاكل نكهه لذيذه وفى نفس الوقت متخليكش تلاحظى قلة الملح فى الاكل.
3. السكريات :
السكر محفز قوى لزيادة الالتهاب وكمان زيادة الوجع فى فترة الحيض وبالرغم من ان ستات كتير بيحسوا برغبه مش عاديه فى أكل السكريات فى فترة الدوره الشهريه فهما ممكن يأكلوا الفاكهه المختلفه.
4. اللحوم الغنيه بالدهون :
اللحوم بتحتوى على احماض بتسبب فى زيادة التقلصات والتشنجات فى فترة الدوره الشهريه علشان كده بينصح الدكاتره بالابتعاد عنها فى الايام الاولى من الفتره دى لانها ممكن تسبب الاحساس بالانتفاخ او الاحساس بوجع فى الثدى.
5. الدهون غير المشبعه :
الدهون الغير مشبعه او الزيوت المهدرجه الموجوده فى الوجبات السريعه والاكل الجاهز زى البطاس المقليه والهوت دوج وغيرها من الاكلات ، بتضاعف من وجع الدوره الشهريه.
6. منتجات الالبان :
منتجات الالبان مبتسببش الاحساس بالانتفاخ وبس لأ بتسبب كمان فى تضاعف الاحساس بالوجع فى فترة الدوره الشهريه والمنتجات دى بانواعها كلها والايس كريم والاجبان.
