حواديت ماما .. الكارتون والقوه الخارقة
حواديت ماما .. الكارتون والقوه الخارقة
فقرة حواديت ماما النهارده مشكله بتواجهنا كلنا
تعالوووووو نشوووووف حل وسمعووونى ارائكم بلييييز
” استعدوا للقتال.. هيا بنا إلي الفضااااااااااااااااء”.. ترتااا..طخ ..طوخ .. بوووووووم
أوكي متتخضوش دي كانت الموسيقي التصويرية لفترة اللعب بين كيمو و ميمي و لولو ! ، ابني حبيبي الكبير العاقل، متخيل إنه احدي شخصيات الكارتون ذو القوة الخارقة و الطاقة الهلامية إللي بتمشي ع الحيطة و تطير فى الفضاء و تحارب طواحين الهوا..
مؤخراً، لاحظت أن ابني كيمو بيفضل قاعد كتير قدام التليفزيون، اهتماماته فجأة تحولت من الكورة و اللعب باﻷلعاب بتاعته للعب بريموت التليفزيون بين قنوات الكارتون المختلفة، فى اﻷول كنت بقول عادى بس لما بدأت أركز فى الكارتون اللي بيشوفه لقيت إن كله يأما بينحصر فى أبطال ذو قوة خارقة أو تصرفات عدوانية شرسة أو تصرفات لا تناسب سن و تربية ولادي!!
فين أيام كارتون الفواكه و دولفي و عبقرينو و باني باني !!
طبعاً يا ماميز بدأت شوية بشوية أحاول أقلل من فترة مشاهدته للكارتون و بدأ يزهق م اللعب مع اخواته.. لحد ما تحول من مشاهدة الكارتون لتطبيقه عملي.
كيمو بقي بيمشي ع الحيطة فعلاً -بيطلع ع الباب- و اخواته يسقفوله، بقا بيشرب المياه أو العصير كإنه باور خارق و يقوم يجري فى الشقة، بيعامل اخواته أنهم كائنات فضائية شريرة لازم يتخلص منها.. و شوية بشوية بقا عامل كوباية الزبادي تليفون يكلم بيه الفضاء الخارجي.
فى الحقيقة، البيت عندي اتحول لـ MBC Action .. و الفكرة إن مش عايزة أخد معاه رد فعل زي الزعيق و الضرب ﻷنه هيتمادي أكتر ، ولو لغيت قنوات الكارتون هيعند زيادة و لو مأخدتش أي رد فعل خالص ابني هيتحول لكائن افتراضي من كتر الخيال اللي عايش فيه..
أنا حالياً بتواجهني مشكلة اختيار المحتوي المناسب اللي يشوفوا ابني، يا تري اسيبه ينمي خياله ولا الخيال الزيادة غلط؟ ياتري ايه البديل هل نشاط فى نادي أو ألعاب تانية -طيب ولو مفيش وقت-؟
أنا متخيلية كتير منكم يا ماميز مر بنفس المشكلة أو بيمر بيها، يا تري بتتصرفوا مع أطفالكم إزاي فى المواقف دي؟
