أفضل طرق التخسيس بحسب المرحله العمريه
أفضل طرق التخسيس بحسب المرحله العمريه
لكل مرحله عمريه وزنها المناسب ، وفى عوامل خارجيه وداخليه بتتحكم فى كل مره بزيادته أو نقصانه عشان كده ضرورى انك تختار نظامك الغذائى على اللى بيفرضه عليك عدد سنواتك.
سنوات الـ 20:
فى المرحله دى لازم تاخد وجباتك فى مواعيد ثابته ومتاكلش اى نوع من الاكل فى الفتره الفاصله بينها ، وبننصحك بانك تركز على الاسماك واللحوم الخفيفه والخضار ومن الافضل انك تتمنع عن شرب المشروبات اللى فيها سكر والاكل المصنع وخصوصا المعجبنات واهتم على تزويد جسمك بالمغنسيوم عن طريق أكل اللوز غير المملح ومتنساش تمارس المشى السريع لمسافات قصيره.
سنوات الـ 30 :
لو عايز تحافظ على رشاقتك فى المرحله العمريه دى اهتم بأنك تاكل الاكل الغنى باحماض الاميجا 3 زى الاسماك الدهنيه ومتنساش تاكل اللوز والكاجو وانك تضيف للأكل بتاعك الخميره والرز الكامل لان الانواع دى بتقلل من حاجتك للسكر.
سنوات الـ 40 :
فى حالة انك بلغت مرحلة الاربعينات وعايز تحافظ على وزن صحى متنساش القاعده دى .. تكتر من أكل الفاكهه ومن شرب عصيرها الطبيعى وخصوصا فى الفتره الفاصله بين الوجبات وكمان اضافة لوجباتك كوباية زبادى طبيعى واهتم انك تقلل من استهلاكك للدهون الضاره وافتكر تمارس تمارين القلب أو المشى أو السباحه 3 مرات فى الاسبوع لمدة 45 دقيقه كل مره لانها بتحفز عملية تذويب الدهون .
سنوات الـ 50 :
لما تبلغ سن الخمسينات افتكر القواعد دى .. تاكل جرام من البروتين يوميا عن طريق اللحوم غير الحمرا الخاليه من الدسم والاسماك ومشتقات اللبن والبقوليات ، اتجنب على قد ماتقدر تناول الدهون وركز على الاكل الغنى بالاحماض الدهنيه الاساسيه زى الاميجا 3 اللى بتمنع اصابتك بأمراض القلب ، اختار الاكل اللى ليه مؤشر غليسيمي منخفض زى الحبوب الكامله وطبعا ابعد عن الأكل فى الفتره الفاصله بين الوجبات ، ومتنساش تختار الاكل الغنى بالمغنسيوم عشان تتجنب الرغبه فى تناول السكر ، استبدل السكر الابيض بالعسل وأشرب من 3 لـ 4 كوبايات شاى اخضر يوميا وركز على تمارين العضلات.
نصيحتين لكل الاعمار :
1 _ اتناول الاكل اللى بيحسسك بالشبع زى الشوربه والزبادى ونخالة الشعير.
2_ اتناول الفراوله فى الفتره الفاصله بين الوجبات لانها مش بتحتوى على سعرات حراريه كبيره وكمان غنيه بالكزيليتول وهوه سكر صحي .
