اسباب الشخير وطرق الوقايه والعلاج
اسباب الشخير وطرق الوقايه والعلاج
بيعانى ناس كتير من مشكلة الشخير واللى بتسبب ليهم متاعب صحيه كتيره وكمان بتأذى اللى بيناموا معاهم فى نفس الأوضه .
أسباب الشخير :
فى اسباب كتير بتسبب أصوات شبه صوت ألة تحميل الخشب وبيرجع ده لقانون الجاذبيه اللى اكتشفه نيوتن وخصوصا لو كان صاحب المشكله بينام على ضهره يبقى فى الحاله دى بتأثر الجاذبيه فى النسيج الرخو الموجود فى مجارى الهوا العلويه ، واللى بيقع هوه أو اللسان على الحلق ويعيق دخول الهوا ، وغالبا بيحصل ده بسبب زيادة وزن الشخص أو لانه يتناول المشروبات الكحوليه بليل .. ناهيك ان السبب الرئيسى عشان يتنفس المريض عن طريق فمه هو انسداد الانف واللى بيخلى تيارات الهوا تمر عن طريق الفم وبتعمل اهتزازات لسقف الحلق الرخو وبالتالى يحصل الشخير .
اضافة لاسباب تانيه من عيوب خلقيه زى اعوجاج الحاجز الأنفى أو ضيق فتحتين الأنف الخارجيتين واللى بيسبب تقليل كمية الهوا اللى بيمر عن طريق الانف واللى بيجبر المريض على التنفس بطريق الفم .
وممكن كمان يحصل الشخير بسبب قصر الرقبه وتشوه الفقرات العنقيه والسمنه ونقص الكالسيوم الا أن أهم اسباب الشخير عند الاطفال تضخم اللحميه خلف الانف أو تضخم اللوز .
ازاى نخفف من حدة الشخير ؟
شوية نصايح تخفف على الأقل من صوت المنشار ههههه يعنى الشخير ويكون صوت خفيف زى اوراق الشجر فى ليل خريفى غائم … ياسلام عليا وعلى التشبيه
1_ مارس الرياضه يوميا لان اللى بيمارسوا الرياضه كل يوم قليل مابيتصابوا باحتقان فى مجارى التنفس العلويه ، والرياضه بتحسن الحاله الصحيه للأوعيه الدمويه وبتقوى القدره على التنفس وسعة استيعاب الرئتين لكميه أكبر من الهوا واللى هيخليك تتغلب على المشاكل اللى بتسبب الشخير ولكن لازم تتجنب الرياضه قبل النوم مباشرة لأنها بتسيب الجسم مشحون على نحو يمنع النوم غالبا.
2_ توقف عن التدخين لانه سبب تغييرات فى نسيج جهازك التنفسى اللى بيتحمل مسئولية الشخير ولأن التبغ بيزود الاحتقان فى أنفك وحلقك وبيزود تورم الاغشيه المخاطيه للحلق ولمجارى الهوا العلويه وكمان بيقلل كمية الاكسجين الداخله للرئتين .
3_ تجنب النوم على ضهرك خاصة للاشخاص اللى عندهم استعداد للشخير لانه بيسبب سقوط اللسان لورا وانتفاخ الفم وقت النوم عشان كده يفضل النوم على أى جنب .
4_ اتجنب النوم فى الاماكن اللى بتتدفى مركزيا وكمان العربيات المكيفه بالهوا .
5_ تناول مهدئات طبيعيه قبل النوم زى كوباية لبن سخنه وكمان أعمل حمام دافى للرجلين واحذر الحبوب المنومه .
6_ نام لفتره أطول .. من المعروف كل ماقلت ساعات النوم كل مازاد احتمال الشخير عشان كده ممكن تحل المشكله أما بالنوم قبل ميعاد نومك بساعه واحده أو حاول انك تتأخر فى الصحيان ساعه واحده برضه .
7_ نام على سرير صلب وبدل الفرش أو نجده عشان كل ماكان مرتخى ومش مريح هيزود المشكله والفرش الصلب بيساعد على انه يخلى رقبتك مستقيمه وبيقلل من الانسدادات فى مجرى الهوا العلوى عندك ، ويكون أحسن ان يكون الفرش مرفوع شويه من ناحية الرجلين لانه هيخفف اهتزاز النسيج الى بيقل جزئيا مجرى الهوا ، وممكن تحط اى حاجه او قطعة خشب تحت المرتبه .
8_ ارفع راسك شويه وقت النوم لانه بيساعد على تغيير زاوية النوم بين الراس والجسم وبالتالى بيسهل التنفس وبيقلل احتمال الشخير .
