طرق الوقايه من مرض السرطان
طرق الوقايه من مرض السرطان
ودلوقتى هعرض عليكم ابرز الاسباب البيئية للسرطان وازاى الوقاية منها :
الهرمونات :
البنات والستات بياخدوا الهرمونات من خلال حياتهم عن طريق مثلا حبوب منع الحمل او اى علاج هرمونى بديل وبالرغم من ايجابيات وفوائد العلاج ده الا انه بيزود من خطورة السرطان وخصوصا سرطان الثدى والرحم والمبيض.
عدم الرضاعة :
للرضاعة فوايد كتير لطفلك وليكى كمان ، وانك مترضعيش طفلك بيزود من خطورة الاصابة بسرطان الثدى وللأسف فى ستات كتير بياخدوا قرار انهم ميرضعوش ولادهم وميعرفوش المعلومة دى.
الاشعة :
كمان التعرض للأشعة بيزود من احتمالية الاصابة بالسرطان زى سرطان الدماغ وسرطان الدم وانواع تانيه كتيرة ، وممكن اننا نتعرض للأشعة واحنا فى شغلنا او تلقى علاج بالاشعة.
العدوى :
فى انواع من العدوى بتزود خطورة السرطان لو اتصابنا بيه لاقدر الله وممكن الوقايه من العدوى بطرق كتيرة وان الفيروسات ممكن توصلنا للسرطان اكتر من الجراثيم واهم انواع الفيوسات دى هيا :
· فيروس التهاب الكبد من نوع ب وسي، يسببان سرطان الكبد.
· فيروس الورم الحليمي (HPV- Human Pappilloma Virus ) يسبب سرطان عنق الرحم.
· فيروس عوز المناعة البشري (HIV- Human Immunodeficiency Virus ) يسبب الليمفوما.
· وكمان فيروس ايبشتاين بار (EBV- Epstein bar virus ) يسبب الليمفوما.
اشعة الشمس :
التعرض لاشعة الشمس لوكان بشكل مكثف ومستمر او على فترات متباعدة ممكن يؤدى لسرطان الجلد واخطر انواع سرطان الجلد هو الورم الميلانينى ، وممكن الوقاية من اشعة الشمس باننا منتعرضتش ليها اوى او باننا نستخدم المراهم المضادة لاشعة الشمس.
المواد الكيميائية فى العمل :
فى كتير من المواد الكيميائية حوالينا وممكن تسبب عدة انواع من السرطان لكن التعرض الشديد لبعض المواد الكيميائية هو ده الاكتر سوء وممكن يتسبب فى سرطان الرئة ، ولازم نستخدم ادوات الوقاية فى الشغل زى الكمامات وهدوم خاصة ده بيقلل من خطورة السرطان بشكل ملحوظ.
الكحول :
بيخلينا مبسوطين اوى لما بنشربة ، بس الكحول بيسبب اضرار كتيرة ومنها امراض السرطان زى سرطان الكبد والفم والحلق والحنجرة والمرئ وغيرها.
السمنه :
السمنه اضرارها مش بتقتصر بس على امراض القلب والاوعية الدموية والسكر ، انما كمان بتزود من خطورة الاصابة بالسرطان زى سرطان المرئ والمعدة والقولون والرحم والكلى وغيرها ، وبيكون فى الستات اكتر من الرجاله.
التغذية :
التغذية الغلط ومش سليمة بتسبب فى امراض كتيرة زى امراض القلب وعسر الهضم والتصلب العصيدى وكمان امراض السرطان ، وقلة الخضار والفاكهه وقلة الالياف ، وكترة الملح واللحمه الحمرا من ضمن التغذية السيئة والتغذية الغلط دى بتزود خطورة الاصابة بسرطان الكبد والقولون والمعدة والوقايه انكم تهتموا بالتغذية السليمة.
التدخين :
من الواضح ان التدخين بيسبب امراض السرطان زى سرطان الرئة والمعدة والقولون وغيرها ، وباختصار الحل هوه البعد عن التدخين ونبطله خالص.
