اسباب وعلاج حمى التيفود عند الاطفال
اسباب وعلاج حمى التيفود عند الاطفال
حمى التيفود عند الاطفال من أخطر المشكلات اللى ممكن يتعرضوا ليها لأن الطفل فى كتير من الاوقات بيتعرض لمضاعفات خطيرة بسبب الحمى دى ، وحمى التيفود عند الاطفال عبارة عن عدوى جرثوميه بيتصاب بيها الطفل وبتسببله مضاعفات خطيره وممكن كمان توصل للموت لاقدر الله ، والاطفال بيكونوا اكتر من غيرهم للتعرض لحمى التيفود وبتنتشر فى الدول الناميه اكتر من الدول المتقدمه.
اسباب اصابة الاطفال بحمى التيفود :
الطفل بيتصاب بحمى التيفود بسبب تواجد الجرثومه المسببه للعدوى فى الأكل أو الشرب اللى بياكله الطفل وممكن كمان تنتقل العدوى من اختلاطه بشخص مصاب بأن ممكن الشخص المصاب يعمل بنفسه الأكل أو الشرب بعد استخدام الحمام من غير غسل ايديه كويس جدا.
وفى حالة ان الطفل يكون موجود بين ناس مصابه بالمرض هيتعرض للأصابه بالمرض نفسه بسهوله ، وخصوصا ان الجهاز المناعى عند الاطفال بيكون اضعف من غيره وبيكون سهل تنتقل العدوى ليه من غير اى مقاومه.
أعراض إصابة الأطفال بحمى التيفود :
مبتظهرش اعراض الاصابه بحمى التيفود بمجرد الاصابه بالمرض لكن بياخد فترة على ماتبدأ الاعراض بالظهور واضحه والاعراض بتظهر فى خلال من 7 لـ 14 يوم من الاصابه بالعدوى وفى بعض الحالات بتفضل العدوى متوطنه فى جسم الطفل ومبتظهرش عليه اى اعراض مرضيه واضحه لحد شهرين كاملين وبعدين تبدأ الاعراض بالظهور فاجأه ، والدكارتة ميعرفوش ايه سبب تأخير ظهور الاعراض كل الفترة دى ، والاعراض الخاصه بالمرض هيا :
1 – من أول أعراض إصابة الطفل بحمى التيفود هوه تعرضه لإرتفاع شديد في درجة الحرارة يوصل للحمى ، وبترتفع درجة حرارة الطفل بالتدريج ومبتتحسنش لحد ماتوصل لـ 39 أو 40 درجة مئوية ، ومبتتحسنش درجة الحرارة الا بعد مانبدأعلاج العدوى .
2 – يشكى الطفل من الصداع طول اليوم .
3 – يفقد الطفل نشاطه ، ويتصاب بالتعب والخمول ، وميقدرش يمارس الانشطة الطبيعية بتاعته.
4 – يشكى الطفل كمان من وجع فى البطن ومعاه إسهال .
5 – على النقيض بيتصاب بعض الاطفال بالإمساك الشديد .
6 – يظهر طفح جلدي في اماكن متفرقة من جسم الطفل ، والطفح ده عبارة عن بقع وردية بتتركز عل البطن والضهر .
7 – بيعاني بعض الأطفال كمان من إلتهاب الحلق .
مضاعفات حمى التيفود عند الاطفال :
لما بيتم اهمال علاج حمى التيفود عند الاطفال بتسبب مضاعفات خطيرة للمريض واللى منها :
1. بيفقد الطفل نسبه كبيرة من وزنه وفى زمن قصير جدا.
2. بيتصاب الطفل بنزيف معوى بيسببله مضاعفات أكبر.
3. لما الاضرار الناتجه من العدوى تتضاعف بتفضل درجة حرارة الطفل تترفع لحد ماتوصل لموتة بعد الشر على كل اولادنا.
علاج حمى التيفود عند الأطفال :
بيبدأ الدكتور بعلاج الطفل المصاب بحمى التيفود بخطوات مهمة للسيطرة على العدوى ومنع المضاعفات :
1. بيدى الطفل اول حاجه مضاد حيوى مناسب لعمرة وحالته الصحيه.
2. وبيديله كمان بعض المسكنات البسيطه علشان وجع البطن والصداع وغيرها من المتاعب.
3. بيتم كمان علاج التهاب الحلق عن طريق انه ياخد الادوية المناسبه ليه.
4. علشان يعوض الاسهال الشديد اللى بيتصاب بيه الطفل بيديله الدكتور كميات كبيرة من السوايل لتعويض الجسم عن السوايل اللى فقدها بشكل سريع وممكن يحتاج بعض الاطفال محاليل الجفاف.
5. بينصح الدكتور أهل الطفل بالاهتمام والدقة فى نوعية الأكل اللى بياكله الطفل ولازم يشرب الطفل الميه المعدنيه المعلبه والأكل الموثوق فى نضافته وكمان لازم الاهل يهتموا بنضافة الطفل وتكون ايديه دايما نضيفه ومعقمة قبل الأكل وبعده.
6. بيفضل الدكتور يتابع الطفل أول بأول علشان يضمن انه ميتعرضتش للأنتكاس مرة تانيه.
