تعرفى على مشاكل الحمل بتوأم
تعرفى على مشاكل الحمل بتوأم
اولا: ايه المنتشر اكتر الحمل بتوأم ولا الحمل العادى؟
اغلبية الناس فاكرين ان نسبة الحمل بتوأم نسبه قليله جدا ونادره ومبتحصلش كتير بس الحقيقه عكس كده خالص لان الحمل بتوأم منتشر وفى دراسات بتأكد على ان نسبة الحمل بتوأم بتساوى حالة حمل واحده كل 80 حالة حمل وممكن تكون الدراسه دى كمان اتغيرت وزادت نسبة الحمل بتوأم بعد عمليات التلقيح واطفال الانابيب والمنشطات اللى بيوصفها الدكتور لاغلبية الستات اللى اتأخر حملهم.
ثانيا: ياترى فى انواع للتوائم؟
قليل جدا اللى يعرف ان الحمل بتوأم فى منه اكتر من نوع زى التوأم الحقيقى وهو عباره عن حمل حصل نتيجة تلقيح بويضه واحده بس وبعد كده حصل ليها انقسام ، والتوأم الغير حقيقى وهوه عباره عن توأم حصل نتيجة تلقيح بويضتين فى نفس الوقت ، والتوأم السيامى او التوأم الملتصق وهو عباره عن توأم عادى بس اتاخر عملية انفصالهم ، والتوائم المتعدده وهيا ان الام تولد اكتر من طفلين او تلاته او اربعه وممكن اكتر كمان.
ثالثا.. ايه هيا الاسباب الرئيسية ورا حدوث الحمل بتوائم؟
فى حالات معينه بيزيد احتمالية حمل الست بتوأم وعلى راس الاسباب دى … ان الموضوع يكون وراثى من ناحية الام او ناحية الاب بس بشكل اكبر من ناحية الام ، وان تكون الست الحامل عمرها فوق ال 35 سنه ، ولو كانت الست أتاخر حملها ولجئت لنوع من المنشطات او لتلقيح صناعى او طفل الانابيب علشان الحمل.
رابعا : اوجه الاختلاف بين مشاكل الحمل بتوائم والحمل العادي بطفل واحد!
مبتختلفش مشاكل الحمل بتوأم عن مشاكل الحمل بطفل واحد كتير لكن اكيد فى اختلافات لان الحمل والعبء اللى هيكون على الام الضعف واشد وكمان الحامل بتوأم مسئوله عن تغذية طفلين ومش طفل واحد ، والست الحامل بتحس بدوخه أشد الصبح وبتفضل مستمره معاها لفتره طويله ، وكمان الست الحامل فى توأم بتحتاج تروح للدكتور اكتر من مره فى الشهر يعنى بمعدل مره واحده كل 15 يوم ، وكمان هيزيد وزنها اكتر من الست الحامل فى طفل واحد بحوالى 5 كيلو والست الحامل فى توأم بيزيد وزنها خلال شهور الحمل حوالى من 15 ل20 كيلو بعكس الست الحامل فى طفل واحد هيزيد وزنها من 10 ل 15 كيلو.
خامسا: اكتر المشاكل اللي بتخص الحمل بتوائم ومبتجيش للحامل بطفل واحد
فى مشاكل نسبة حدوثها كبيره اوى للحامل بتوأم ومنها انها بتتعرض للولاده المبكره لان اغلبية التوائم بيتولدوا فى الاسبوع ال 37 من الحمل ، واصابة الاجنه بمتلازمة نقل الدم الجنينى لان المتلازمه دى مبتحصلش الا فى حالات الحمل بتوأم وخصوصا فى الحمل بتوأم حقيقى لان واحد من الاجنه بياخد الدم اللى جاى من الام عن طريق المشيمه وبيحرم الطفل التانى من انه ياخد الدم اللى محتاجه لنموه فبيكون نتيجة ده لاما موت واحد فيهم او الولاده المبكره.
