المكسرات فى وجبة السحور
المكسرات فى وجبة السحور
ناس كتير بياكلوا المكسرات فى شهر رمضان وبيحطوها على مشروبات كتير وحلويات عشان فيها ألياف ومعادن مفيده للجسم .
وبتتميز معظم أنواع المكسرات بأنها بتفيد الصايم اللى بيشتكى من أحساس الجوع فى رمضان لأنها بتقلل من الشعور بالجوع عشان كده تعتبر مناسبه فى وجبة السحور .
فمثلا الفستق مصدر غنى بالبوتاسيوم والفوسفور والمغنيسيوم والألياف الغذائيه وكمان بيحتوى على نسبه قليله جدا من الصوديوم المناسب لمرضى الضغط العالى ، وكمان على نسبه قليله من السكريات ، وده اللى بيخليه اختيار كويس لمرضى السكر ، وكمان بيحتوى على الأحماض الامينيه وأنواع من المواد المضاده للأكسده المفيده لصحة القلب والشرايين .
واللوز من أكتر أنواع المكسرات فايده ، لانه بيقلل احتمالية الاصابه بالنوبات القلبيه وبيقلل نسبة الكوليسترول الضار فى الدم ، وكمان اللوز بيحمى شرايين القلب من الترسبات وبيساعد كمان فى بناء عظام وأسنان قويه ، أما عن السعرات الحراريه فـ 30 جرام يعنى زى كبشة ايد مقفوله من اللوز بتحتوى على 165 سعر حرارى .
والصنوبر مصدر جيد للطاقه وغنى بفيتامين أ المفيد للنظر وكمان بيحتوى على دهون مفيده للقلب وبيعزز مناعة الجسم بسبب احتوائه على فيتامين سي ، ده غير كمان انه مصدر غنى بمعدن الحديد المفيد للجهاز العصبى ، أما السعرات الحراريه فـ 30 جرام يعنى زى كبشة ايد مقفوله من الصنوبر بتحتوى على 190 سعر حرارى .
ولازم نهتم باختيار الانواع اللى مش مملحه من المكسرات والاعتدال فى أكلها لانها عالية السعرات الحراريه .
